Medya Uren

 

MÊRDÎN - Cinîya ke bi serran o hetê mêrdeyê ke ey dir zewicnayîbî, şîdet ci rê ameyo kerdene û vengdayîşê paştdayîşî kerde ke aye û domanê aye nê ezîyet ra xelas bibê.

 

Roje derbaz nêbena ke hedîseyê şîdetê serê cinîyan çinbê. Nê cinîyan ra yew zî C. E. ya ke bi qasê 10 serran o hetê mêrdeyo ke ey dir ameya zewicnayîş, H. E. ra şîdet ci rê yeno kerdene. C.E. seba ke 4 domanê xo wey bikera têkoşînê cuye dana. Kesî hewara aye nêeşnawit. Seba ke vengê aye bêro eşnawitiş, C.E. muracatê heme çî kerd û hema zî no vengdayîş dewam keno. C.E. dimayê ke xeylê rey gerre kerd cezaya durvistişî da H.E. cuya C. E. ters de yo û no waştiş ke vengê aye bêro eşnawitiş.

 

C.E. verê 13 serran bi H.E. dir ameya zewicnayîş. Dimayê zewacê H.E. 13 serrî dima reyke bîn zewicyeno û hewî ano serê aye de. Dimayê ke hewî yena serê C. E. cuya ci xeylêk yena vurnayene. Her roje şîdet ci rê yeno kerdene û bi domananê aye tehdîd ci rê yeno kerdene. Aye nika maya 4 domanan a û emrê domanê aye zî mabêne 4-12 de yê. 

 

'Kesêk vengê mi nêeşnawit'

 

C E. wina dest bi qiseykerdişî kena: “Ma koletî qebûl kerdo. Bi 10 serrî yo ez îşkence ancena, seba domananê xo mi heta nika xo ver da la ez êdî nêeşkena û vana êdî bes o. Belkî ez erey zî menda, la ez o êdî nê nêheqî qebûl nêkerî. Seba ke domanî bêpî pîl nêbê, mi vatêne ez derbaz bikerî. La ez nika ewnîyena ke na rewşe psîkolojîyê domanê mi baş nêkerd. No demêk derg o ke ez wazena fek ci ra verda bidî. La demo ke mi gerre kerd, kesî vengê mi nêeşnawit. Mi xo tewr peyîn resna polîsan, la înan zî bawerîya xo bi mi nêard û mi açernayî keye."

 

'Qêrînayîşê domananê mi hişê mi de mend'

 

C.E. çîyê ke nê prosesî de cuyaya wina va: "Her roje bê sebeb dayîne mi ro. Gama ke mi vengê xo vetêne zî mi keye ra eştêne. Reyke zî dayîne mi ro, bi domana xo ya peynî digane bîya, wina da mi ro ez kewta koma. Demêk derg ez nêameya serê hişê xo. Mi eştêne odayêk û ber serê mi de padayîne. Şîdetê serê mi zêdeyêr bîne. Her roja ke şîne, na rewşe tewr xirab bîne. Êdî no zî qîm nêkerdêne seba ke mi bidejno, dayîne domanan mi ro. Lajê min o ke 12 serrî yo, nika terkê keyeyî kerdo û şîyo verê dayîke mi de maneno û ez se kena nîno verê mi. Domanê mi wexto ke pîyê xo vînenê lerzenê."

 

'Heqaret bi mi kenê û danê mi ro'

 

C.E. êdî sere wedarna û reaksîyonê xo vera şîdetî da. C.E. wina qalê serewedaritişê xo kerd û va: "Mi va ez êdî bêveng nêbena. Heme mendişê mi seba rewşa ekonomî û tersê weykerdişê domanan bi. Nika zî bêguman no ters esto. La heta ke ez heqê xo nêgîrî, ez o xo ver bidî. Mi dest bi kar kerd. Na rey zî mecbûr domananê xo tena verdana. Her gama ke vejêna pey mi de bermenê û vanê, ma ra dûr mebe. Reyan seba ke tena nêmanê ez înan bena park û uca de verdena. Gama ke ê teber de bê hîna asayîş esto û zerrîya mi rehet bena."

 

'Do mi û domananê mi qetil bikero'

 

C.E. wina dewam kerd: “Seba ke ez xebityena, serê mi de yenê û mi ra vanê ti karê pîs de xebityena. Vistewre, Vistewr û kesê ke ey dir ameya zewicnayîş roje heqaret bi mi kenê û danê mi ro. La gama ke ez debara xo nêkerî, ê qet domananê mi wey nêkenê. Demêk derg o ne mi ne zî domanê mi ma ey ra quruşêk pere nêgirewt. Ez veng dana ke êdî vengê ma bêro eşnawitiş. La her kes zano ke no çare nîyo. Demêk nêzdî de o do zîndan ra vejîyo û no zulm do reyna dest pêbikerê. Seba nê cuya ma tehluke de ya. Do mi û domananê mi qetil bikero. Ez vengdayîşê paştdayîşî kena."