AMED - Serê qirkerdişê Roboskî ra 9 serrî derbaz bi, hema zî kerdoxî û berpirsîyar nêameyî û ceza kerdî. Cinîyê Amedî wina vatî: “Tena qirkerdişê Roboskî ney, xeylêk qirkerdişê bi no hawa serê kurdan de ameyê kerdene. La ma do tu qirkerdişê serê ma de ameyê kerdene de xo vîr ra nêkerê. Seba ke ê rastîyê dişminî ramojnenê. Ma wazenê qirkerdişê Roboskî, yê verê ci û badê ci bêro roşnkerdiş.”

 

9 serrî verê 28ê Kanûna 2011 de dewa Roboskî yê serê qezaya Qilebanî Şirnexî ra bombebaranê teyareyê şer yê Hêzê Çekdar yê Tirkîya (TSK) de 19 ci ra domanî, 34 hemwelatî ameyî qetilkerdene. 9 serrî verê, la hema zî kerdoxî û berpirsîyarî nêameyê muhakemekerdene. Selahîyetdarê hukmatî heme sozê ke do kerdoxan vejê meydan dayî bi ca nêardî. Dimayê dadgehê Tirkîya dosyayê Roboskî red kerd, avûkatan dosya erşawit, Dadgeha Heqê Merdiman ê Ewropa (DMME) û bi sebebê, “heme rayîrê huqûqê mîyanî nêqedîyayê” ame redkerdene. Seba ke dosya ameye padayene, avûkatê keyeyê Roboskî reyke bîn delîl kom kerdî û muracatê Dozgerîya Komara ya Qilebanî kerdî.

 

Her serre, serrgera qirkerdişî de bernameyê vîrardişê 34 kesan yeno kerdene. Na rey serrgera Qirkerdişê Roboskî de ma cinîyê Amedijan ra ercnayîş girewt.

 

‘Ma wazenê qetlîamê sey Roboskî û yê bînî bêrê roşnkerdene’

 

Cinîya bi nameyê Seher Tumer bale ant serê hedîse û va: “Qetlîamê Roboskî xeylêk bi dej o. Ma zanê ke kolberî bi se serran o serê na herre de yeno kerdene. No êdî bîyo mecbûr. Herême nêzdîyê sînorî yeno vatene ke ê nêwazenê bi no hawa debara xo bikerê. Labelê seba rewşa ekonomî û feqîrî dewlete kesan kena na rewşe. Şarê ke Tirkîya de ciwîyenê her ke şino kewenê krîzêk kûr. Kolberî yew metodê debare yo. Dewlete zî nê çî zana. Pêwa nê bi bombarduman 34 kesî xeylê xo domanî, Roboskî de ameyî qetilkerdene. Dîmenê ke di kesî serê estorî de bî, zerrîya merdimî veşnayîne. Dima ra vejîya werte ke dewlete emir dayo. La kes nêame cezakerdene. La ma zanê ke keyeyê Roboskî tu waştişê dewlete qebul nêkerdo û bi serran o şîn gênê. Ma wazenê qetlîamê sey Roboskî û yê bînî bêrê roşnkerdene.

 

‘Gama ke ma dî ma zaf kewtî ver’

 

Emîne Karli dîyar kerd ke gama ke aye na hedîse televîzyon ra temaşe kerda, xeylêk xemgîn bîya û wina va, "Zerrîya mi veşêna. Xeylê xo domanî bî. Seba feqirî û belengazî bî hedef. Dejê dayîkê înan xeylêk o.”

 

‘Dej û zulmê winasîyan ra êdî bes o’

 

Halîme Saran zî va ke wexto ke dîmen temaşe kerdê xeylêk înan domanî bî û wina va: "Homa heqê înan û keyeyê înan nêverdo. Ma pêro xemgin bî. Wa êdî dej û zulmê winasî rê bes bo. Xora her wext zulm serê ma de estbi, bi nê kiştişî û tedayan zî êdî ma musaynê dej û kiştiş. Domanê înan zî bî, la wijdan înan dir nêmendo, nê zulmî kerdî û zerrîya keyeyan veşnayî.”

 

‘Ma ne Roboskî û ne zî qirkerdişê bînan nêkenê xo vîr ra’

 

Fatma Toprak zî derheqê hedîse de wina va: “Hukmat merdiman kişeno. Ma nêwazenê tu kes bimiro. No zulm nîno qebulkerdene. Hedîseyê Roboskî qirkerdiş o. Zulmêk zaf pîl bi. Ma televîzyon de dî. Erdogan waşt ke pere bido ê keyeyan la merdim nêeşkeno qebûl bikero. Kesê ke domanê mi bikiştêne mi çîyêk zî nêwaştêne. Ma nê zulmî qebul nêkenê. Serê kurdan de zulmêk zaf giran esto. Ê domanî bîlasebeb ameyî kiştene. Seba nan û seba feqîrî kewtî sînoran. Xora ma kurdî her hawa zulm vînenê, no qirkerdiş hîna derdê ma zêde kerd. Tena qetlîamê Roboskî ney, xeylêk qetlîamê bi no hawa serê Kurdan de ameyê kerdene. La ma do tu qetlîamê ke serê ma de ameyî kerdene xo vîr ra nêkerê û nêdê xovîrrakerdiş. Seba ke ê raştîyê dişminî mojnenê ma.”