AMED - Bernameyê Hinek Henek ke her hewte tewir bi tewir babetan ser o vejêno vernîya temaşekerdoxan, amadekarîyê bernameyê taybet ê serrneweyî keno.

 

Bernameyê Hinek Henek ke skêçê ci henekê kurdkî ra yenê meydan, her hewte bi babetêk newe dir vejîyeno vernîya temaşekerdoxan. Skecan de 13 ci ra kaykerdoxê bingeyîn ê Tîyatroyê Şaristanî yê Amedî, Teatrê Jiyana Nû, Teatrê Mencel û Teatrê Yekta Hêvî 18 kaykerdoxî kay kenê. Bernameyo ke heta nika 11 beşê ci ameyê weşanayene, balêk pîl anceno serê xo. Nika zî Hinek Henek amadekarîyê bernameyêk taybet ê serrneweyî keno. Derheqê babete de kaykerdoxê Hinek Henekî Rûgeş Kirici û Şîlan Alagoz ajansê ma rê qisey kerdî.

 

‘Hêvî û waştişêk pîl seba Hinek Henekî esto’

 

Kaykerdoxe Şîlan Alagoz dîyar kerd ke hêvî û waştişêk pîl serê bernameyê Hinek Henekî esto û va: “No demêk derg o ke ma xebata bernameyê Hinek Henek kenê. Ma xebatê xo prosesê pandemî de serê înternetî bi hawayêk Zoom viraznenê. Xeylêk  skêç ma rê ameyî. Ma ê skêçan hûmart û dest bi xebatê înan kerd. Ma 15 rojan ra reyke ameyî têhet û 4 kom pîya xebatê xo kerdî. Bi no hawa skêçê xo ma vejenê û weşanê înan kenê. Nika zî seba serê serre bernameyêk ma yê taybet esto ke ma amedekarîyê ci kenê. Gama ke ma weşêna, hetê temaşekerdoxan ra ame ecibnayene. Coka zî ma lazimî dî ke seba serrnewî bernameyêk baş amade bikerê. Ma dest bi amadekarîyê xo kerd û xebatê ma kêfweşî dewam kenê. Ma hêvî kenê ke temaşekerdoxê ma zî biecibnê û kêfweş bimanê. Ercnayîşê temaşekerdoxan ra ma serê înternetî ra ewnîyenê. Xeylê xo çîyê pozîtîf estê. Ma zî waşt ke hêvîyê înan veng nêverdê. Ma hêvî kenê ke serrneweyî seba ma kurdan û seba merdimayî serrêk zaf weş bo.”

 

‘Bernameyêk taybet o ke ci de kêf, yarînîye û hîkayeyê weş estê’

 

Kaykerdoxe Rûgeş Kirici zî qisey kerd ke bernameyêk tabet o ke ci de kêf, yarenîye û hîkayeyê weş estê û va: “Her skêçan de babete vuryena. Zafê xo çîyê komel û rojane yê. Her hewte babetêk newe yena weşaneyene. Heta nika 11 beşî ma weşan kerd. Bi rastî zî karêk hem zehmet û hem zî kêfweş o. Nika zî ma amadekarîya serrneweyî kenê. Bernameyêk taybet ke ci de kêf, yarînîye û hîkayeyê weş ca gênê estê. Eynî wextî de ê yê hunermend û muzîkjenan zî tewrê bername bikerê. Formatêk têmîyan ke pêro tewirê hunerî pîya kenê. Heta nika beşê ameyê weşaneyêne hîn tîp û karakterê ma yê kaykerdoxî vejîyayî vernê. Ê tîp û karakterê ma bi xo zî amadekarîyê serrneweyî kenê. Hîkayeyê înan bi xo estê. Ez umîd kena ke şewêka weş derbaz biba û temaşekerdoxê ma kêfweş bimanê. Serrneweyî her kesî pîroz kena.”