MERKEZÊ XEBERAN - Cinîyan reaksîyon hemverê tepiştişê Hemsereka KCDyî Leyla Guven da û vatî: "Îqtîdar, bi her hawa hêrişê  cinî, ciwan, HDPyî û muxalîfan keno û wazeno ke înan bêveng bikero. Serê Leyla de wazenê mesajêk bidê komelî. La ganî baş bêro zanayene ke ma qetî bêveng nêbenê û nêtersenê."

 

21ê kanûne de, 9in Dadgeha Cezaya Giran ya Amedî 22 serrî û 3 mengî ceza da hemsereka Kongreya Komela Demokratîke (KCD) û aktîvîsta Tevgerê Cinîyê Azad (TJA) Leyla Guven. Leyla eynî şewe de ameye tepiştene û destbendkerdene. Dimayê ke Leyla berdî Zîndanê Cinîyan ê Tîpê T yê Amedî, dima ra surgunê Zîndanê Xarpetî ameye kerdene. Derheqê tepiştişê Leyla de cinîyan fikrê xo ardî ziwan.

 

'Ganî ma bêveng nêbê' 

 

Endama Mayanê Aştî ra Hedîye Korkut, reaksîyonê xo wina ard ziwan: Ganî hemverê tepiştişî bêveng memanê. Ma zulmo ke yeno kerdene, qebul nêkenê. Wa komel temamî hemverê koletî wirzo serê lingan. Seba Leyla û seba HDPyî xo ver danê. Ewro zîndanan de grevê vêşanîye estê. Ganî her kes seba tepişteyan bikewo mîyanê hewldayîşan."

 

'Heme muxalifan tersneno'

 

Hemsereka Partîya Demokratîke ya Şaran (HDP) ya Îzmîrî Besrîye Tekgur, dîyar kerd ke îdiayê ke derheqê Leyla de yenê kerdene rast nîyê û va: "Na ceza seba tersnayîşê cinî, şarê Kurd û muxalefî yo. No çî yeno manaya krîzê îqtîdarî yê îdarekarî. Weçînayîşê 31ê adare û 24ê hezîrane de HDP cayêk dîyarkerde bi. HDPyî Tirkîya de muxalefetîyêk bi hêz keno. Seba ke îqtîdar cinî, ciwan, HDPyîjan û muxalîfan aciz o, hêrişê înan keno. Wazeno ke bikero mîyanê 4 dêsan. La ganî bêro zanayene ke HDP bi 4 dêsan nîno meydan."

 

'Ma têkoşînê xo de heqdar ê'

 

Besrîye, dîyar kerd ke nika zîndanan de grevê vêşanîye estê û va: "Bi rayberîya Leyla grevê vêşanîye amebî destpêkerdene û netîceyî de pêvînayîş ame kerdene. La dimayê demêk reyna tecrîdê Îmralî ame girankerde. Nika tepişteyan reyna dest bi grev kerd. Ma vînenê ke îqtîdar bi her hawa ziwanê hêrişî aver beno. La ganî bêro zanayene ke 40 serrî yo nêeşkenê nê şarî bêveng bikerê. Pêwa her çî do hewldayîşê îqtîdarî birijyê, seba ke ma têkoşînê xo de heqdar ê."

 

'Şexsê Leyla de mesajêk danê' 

 

Endama Meclîsê Partîya HDPyî Ayfer Demîrel wina va: "Leyla xebata kampanyaya TJAyî ya 'Ma xo pawenê' kerdêne û hemverê taciz, tecawiz û şîdetî têkoşînêk dayîne. Proseso ke grevê vêşanîye ameyî destpêkerdene de Leyla ameye tepiştene. Şexsê Leyla de mesajêk danê şarê Kurdî. Ganî bêro zanayene seba sîstemê hukmatî grev ame destpêkerdene. Tena zîndan ney Tirkîya bi pêroyî mîyanê tecrîd de ya. Bi her hawayî polîtîkayê hêrişî yenê kerdene. Pêwa hêrişê HDPyî hem teber de û hem zî zere de têkoşîn dewam kenê. Ganî bêro zanayene ke şar qetî peyser game nêerzeno."

 

'Îqtîdar bi her hawa hêrişê komelî keno'

 

Vervatoxa Kongreya Demokratîke ya Şaran ê Muglayî Dîlek Gokçîn, wina bale ant serê têkoşînê Leyla: "Leyla seba xelasîya cinîyan her wext bi înad têkoşîn kerd. Tepiştişê Leyla bi tu hawayî hetê cinîyan ra nîno qebulkerdene. Wexto ke Leyla berdî zîndan va, 'Bixebityê ke ma reyke bîn bêrê.' No vatişêk girîng o. Nika îqtîdar bi her hawayî hêrişê komelî keno û wazeno heme muxalîfan bêveng bikero. Qerarê Dadgeha Heqê Merdiman ê Ewropayî (DMME) yê derheqê Selahattîn Demîrtaş de dayo nimûneyêk o."