Medya Uren 

 

MÊRDÎN - Roniştixê Qoserî hemverê vayîyê fatureyê ceyranî de reaksîyonê xo vatî: "Ma êdî nêeşkenê debara xo ya rojane bikerê. Ekonomîya ma zaf bîya xira. Nika ra ma kewtê endîşeyê vayîyê fatureyê ceyranî. Gelo kesê ke nêxebityenê do senîn fatureyan bidê?"

 

Tesîrê krîzê ekonomî bi qedexeyê newe hemverê vîrusê koronayî de ameyî girewtene hîna kûr bi. Welatijî nika seba vîrus û hem zî seba krîzê ekonomî perîşan bîyê. Roniştoxê Qoserî yê Mêrdînî, hemverê vayîya çîyan û bi taybetî zî zêdebîyayîşê vayîyê ceyranî de reaksîyonê xo ardî ziwan. Xeylê keyeyê ke nêeşkenê debara xo yê rojane bikerê, zêdebîyayîşê faturayê ceyranî ra kewtî mîyanê endîşeyan. Roniştoxê kuçeyê Mezopotamyayê Qoserî yê Mêrdinî reaksîyonê xo ajansê ma rê ardî ziwan.

 

'Îmkanê karî çin o' 

 

Sultan Bogurcuya ke taxa Mezopotamya de ciwîyena wina bale ant serê probleman: "Problemê ma xelas nêbenê. Ma feqîr ê. Ne karê ma esto ne zî îmkanê ma. Hukmat ma rê îmkanê karî awan nêkerdo. Ciwanê ma nika tewr zêde çîyê xirabî dir eleqedar benê. Çîyêk destê ma ra nîno. Zam ameyo serê heme çî. Ma do feqîrî ra bimirê. La ganî hukmat no bizano êdî feydeyê înan komelî rê çin o."

 

'Ma nêzanê êdî se bikerê'

 

Sultan wina dewam de wina va: "Saetê ma yê ceyranî berdî serê dîrekan de dayî ro. Êdî ê û wijdanê înan. Ma nêzanê do fatura çiqas bêro. Faturayê taxê corîne ameyê û vanê nêzdîyê 800 TL ameyê. Gelo mîyanê nê bêkarî de ma do senîn bidê? Pereyê ma çin o, ma nêeşkenê debara xo ya rojane bikerê. Ê bê wijdanî kenê. Bifikirîyê tenekeyêk rûn bîyo 300 TL. Ma nêzanê êdî se bikerê."

 

'Bi rotişê kartonan ma debara xo kenê'

 

Gulê Demîre zî derheqê krîzî de wina va: " Seba şerê Nisêbînî ma verê xo da Qoser. Ma perîşan bî û domanê ma bi rotişê kartonan debara keyeyê xo kenê. Kar çin o la seba ke ma biciwîyê zî pere lazim o. Saetê ceyranan berdî dayî serê dîrekan de dayî ro. Ma zanê ke no çî tesîrê faturean bikero. Pêwa çinbîyayîşî ma reyna hewl danê ke faturayê xo bidê. Lazim o çareserîyêk bêro vînayene. Ciwîyayîş wina derbaz nêbeno."

 

'Heqê ma yê feqîran çin o' 

 

Sureya Ozer zî dîyar kerd ke demê pandemî de mêrdeyê aye kar ra ameyo eştiş û va: "Kesêk nêxebityeno. Gelo ma do bite gelo fatureyan senîn bidê. Bi krîzê ekonomî dir û pandemî dir mêrdeyê mi kar ra eştî. Tu debara ma çin a. Ma hetêk ra kîra danê, hetêk ra zî faturayan. Domanê ke min ê wanenê zî estê. Seba ke keye de înternet çin o, domanê mi nêeşkenê perwerde bivînê. Heme çî bi pere yo û vayo. Wexto ke pere çinbo zî ma nêeşkenê çîyêk bigîrê. Selahîyetdarê ganî nê rê çareyêk bivînê. Ma hemwelatî rewşêk xeter de yê."