Sara Şêx Hesen

 

HELEB - Cinîyê şaristanê Helebî hemverê tecrîdê serê Rayberê PKKyî Abdullah Ocalan ard ziwan ke ganî tecrîd bi peynî bibo û wina va: "Tecrîd sucêko bêehlaqî yo û ganî peynî bo. Vera tecrîdî do têkoşînê ma dewam bikero."

 

Rayberê PKKyî Abdullah Ocalan 15ê Sibata serra 1999 de bi komployêk mîyanneteweyî esîr ame girewtene û teslîmê dewleta tirkî ame kerdene. No 21 serrî yo Rayberê PKKyî Abdullah Ocalan Giravê Îmralî de demêk derg o tecrîdêk giran ser de yeno kerdene. Hemverê tecrîdî û binpaykerdişê heqê zîndanan de tepişteyan 27ê teşrîna peyêne 2020 de vakur û Tirkîya de dest bi grevê vêşanîye kerdî. Seba tesîrê fikrê Rayberê PKKyî Abdullah Ocalanî yê awankerdişê sîstemêk ê demokratik  dinya de vila beno, no zî bîyo sebebê girankerdişê tecrîdî. Hemverê tecrîdê girankerde şarê Kurdî û dostê înan mîyanê çalakîyan de yê û her waştişê heq û azadî kenê. Derheqê babete de cinîyê şaristanê Helebî fikrê xo qalî kerdî.

 

'Tecrîd sucêko bêehlaqî yo lazim o peynî bêro' 

 

Cinîya bi nameyê Zeyneb Nasir reaksîyonê xo vera tecrîdî da û va: "Tecrîdo ke nika Îmralî de serê Rayber Apo yeno kerdene, sucêk bêehlaqîyî yo û lazim o peynî bo. Dewleta tirkî bi girankerdşê tecrîdî wazena îradeyê ma seba dewaya azadî bipelçiqnê. Fehmê Rayber Apo ma dir yeno cuyayîş. Eke ke dewletê hegemonîk qîmetê azadî bizanê, do hende tecrîd serê Rayber Apo giran nêkerdêne. Merdimêk sey Rayber Apo cayê ey zîndan nîyo."

 

'Wa cinî azadîya Rayber Apo têkoşîn bikerê'

 

Îlham Omar zî derheqê tecrîd de wina va: "Zîndan de xeylêk teda û binpaykerdişê heqan yeno kerdene. Amancê dewleta tirkî oyo ke Rayber Apo komelî ra qut bikero. Lazim o ke destpêk de cinî rayberîya dewaya azadîya Rayber Apo dir bikerê, eke reyna komel kole bibê do tewr zêde cinî zirar do bivîno. Do cinî azadîya Rayber Apo mîsoger bikerê."

 

'Zîndanê Tirkîya de heqê tepişteyan çin o'

 

Fatme Mihemed zî bale ant serê binpaykerdiş ke zîndanê Tirkîya de yenê kerdene û va: "Zîndanê dewleta tirkî de kerdişê bêhuqûqî yenê kerdene. Heqê tepişteyan çin o. Rayber Apo zî xeylêk heqê xo yê huqûqî seke tepişteyêk zîndanî de  bêpar o. Ma wazenê zanayîşêk derheqê rewşa Rayber Apo de bigîrê. Lazim o heme rêxistinê heqê merdiman peynî bêvengîya xo bîyarê û wirzê. Ma do seba Rayber Apo têkoşîn bikerê."