Medya Uren 

 

MÊRDÎN - Hunermende û mamosteya muzîkî Qudret Ucuk kilamanê Mehemet Şêxo “Gulîzerê” bi dayîka xo Manîsa Ucuk dir va. Qudreta ke seba nasnameyê xo hunerê xo aver bena, dîyar kerd ke ganî kultur bi her hawayî bêro pawitene.

 

Qudret Ucuk, Koma Dengê Jinên Azad de seke hunermende û sazbend ca gêna. Sewbîna keyeyê  Komeleya Kultur û Hunerî ya Mezopotamya de sey mamosteya muzikî xebityena û hûmarêk zêde de wendekarê aye estê. Qudrete kilama, “Gulîzerê” ke vatiş û muzîk yê hunermend Mihemed Şêxo yo bi dayîka xo Manîsa Ucuk dir va. Klîb de aye û dayîka xo pîya ca girewt. Qudrete derheqê klîbê xo û xebatê xo de ercnayîşê xo ajansê ma dir par ekerd.

 

Qudrete, sere de girîngîyê hûnerî kerd û wina va: "Komelayê kurd bi hêrişê asîmîlasyon dir rî bi rî yê. Hetê hêrişê ziwan û kulturê ma yeno kerdene. Ma zanê demê peyîn de çiqas komeleyê kulturî ameyî padayene. Kayê bi ziwanê Kurdkî ameyî qedexekerdene. Verê nê hêrişan de çekê ma yo tewr pîl zî pawitiş û averbîyayîşê kulturî yo. Eke ma nêpawê, do çinbîyayîşê ma nêzdî bo. Ma ewro têkoşîn danê. Seba ke domanî ma bimusê, m ahewl danê. Muzîkjenîyê mi zî serê nê esasî de yo."

 

'Ma do her şert û mercan de kede bidê'

 

Qudrete dewam de wina va: "Prosesêk esto vernêya ma de. Hetêk ra zî şûbeyê koronoyî ke heme dinya kerdo binê tesîrê xo. Cayê ke ma yenê hepskerdene, ma karê xo dewam kenê. Ma wendekarê xo musayî û ma hewl da ke wendekarî zî biresê komel. Nê prosesî de barêk girîng keweno serê milê ma û lazim o ma nê çî bi ca bîyarê."

 

'Her çî xozayî yo' 

 

Qudrete tewr peyîn wina va: "No demêk o ma amedekarîyê weşanê klîbî kerdêne. Destpêkê klîbî de dayîka mi ca gêna û kilama Gulîzerê vana. Mi waşt her ç xozayî bo. Ma rê tewr girîng o yo ke wayîrê vejîyayîşê kulturî yo. Eke o çinbo do manayê ci zî çinbo. Dimayê dayîka xo ez kilame dewam kena. Dimayê ke ma weşêna, eleqeyêk pîl virazya. No zî mi zaf kêfweş kerd.