Raperîn Bekir

 

ŞEHBA - Binefş Cimoya ke qirkerdişê dewa Tirindî ya Efrînî de hîrê domanê ci ameyî qetilkerdene, qalê ê wextê ke verê çimanê aye ra nêşinê kerd. Binefşe dîyar kerd ke aye zî hêrişan de birîndar bîya û va: "A rojêka sîya bî. La seba ke reyna domanê ma nêrê qetilkerdene, têkoşîn kena."

 

18ê çeleyê 2018 de dewleta tirkî û hemkarê ci hêriş berdî serê kantonê Efrînî. Hemverê ci de xoverdayîşê serdemê welatijê kantonî pêwa şerwanê YPJ û QSDyî xoverdayîşêk bêhempa kerdî. Xoverdayîşê înan 58 rojan dewam kerd û tarîx de cayêk taybet girewt. Dewleta tirkî a ke rojane herêma sivîlan kena hedef, bi binpaykerdişê heqan de her roje rojev de ya. Hêrişê ke virazênê, hemverê xoverdayîşê welatijan nêbeno asteng û hema zî hemverê hêrişan bi her tewir xo ver danê. Her ke dewlete vînena nêeşkena herême veng bikera û goreyê zerrîya xo îşxal bikera, na rey zî dest bi qirkerdşî kena. Nê qirkerdişan ra yew zî 8ê Adara 2018 de dewa Tirindî yê Efrînî de ame kerdene. Qirkerdiş de tena keyeyêk ra hîrê domanî ameyî qetilkerdene. Dayîka hîrê domanan Binefş Cimoye qalê serebûtî ke a roje ame qewimya kerd.

 

'Bi îradeyêk xurt têkoşîn kena'

 

Binefşa ke wextê qirkerdişî de a bi xo zî birîndar bîya û hîrê domanê ci ameyî qetilkerdene wina qal kerd: "Roja 8ê Adare ya ke heme cinîyê dinya mîyanê çalakîyan de bî zî, qirkerdişê dewleta tirkî dewam kerdêne. Eynî roje de qirkerdiş serê keyeyê mi de zî kerdî û hîrê domanê mi qetil kerdî. Bi domananê mi dir roşnîya çimê zî vinî bî. Lajê mi Hisên Mihemed 16 serre, kênaya mi Helene 14 serrî û qijê keyeyî Ferhad zî 11 serre bi. Nika tena domanêk/e mi mend/e, o/a zî o dem birîndar bibi/î. Birînê Hisênê mi pîze de bi û nîmeyê bedenê Helen û Ferhad zî çinbi. Mi bi destê xo hîrê domanê xo Goristanê Ş. Avesta yê Efrînî de oxir kerd. Erdoganî kezeba xeylêk dayîkanê Efrînî veşna, la xoverdayîşê ê dayîkan îşxalkerdişê dewleta tirkî rê bi cewab. Seba ke reyna domanê ma nêrê qetilkerdene, ez bi îradeyêk pîl têkoşîn kena."