AMED - Yazgul Şahîna ke hemverê tecrîdê serê Rayberê PKKyî Abdullah Ocalan û binpaykerdişê heqan ê zîndanan de çalakîya grevê vêşanî de ya, vengdayîşê hîsgêrî kerd û va: "Ma nê sîstemê faşîzmî ten apîya eşkenê birijnê. Bi kesêk tena dir nîno çareserkerdene."

 

Grevê vêşanîye bi destê tepişteyê sîyasî zîndanê Tirkîya û vakurê Kurdîstanî de hemverê tecrîdê serê Rayberê PKKyî Abdullah Ocalan û binpaykerdişê zîndanan de 27ê teşrîna peyêne de amebî destpêkerdene, dewam de yo. Çalakîya ke bi hawayêk bêdem û bidor amebi destpêkerdene, her hewte komêke newe dewr gêna û her ke şino vila beno.

 

Yew ê tepişteyan ra zî Yazgul Şahîna ke Zîndanê Cinîyan ê Kayserî de ya. Yazgule, 28ê Gulana 2016 de qezaya Pirsûsê Rihayî de netîceyê îxbarêk de ameye destbendkerdene û ameye tepiştene û dima ra sewqê Zîndanê Tarsûsî ameye kerdene. Dima ra Yazgule surgunê Zîndanê Cinîyan ê Bunyanê Kayserî ameye kerdene. Yazgula tepişteyî bi rayîrê telefonî bi keyeyê xo dir qisey kerd û derheqê grevê vêşanî de mesajêk erşawit.

 

'Heta tecrîd nêro peynîkerdene ma do xoverdayîşê xo dewam bikerê'

 

Yazgule dîyar kerd ke heta tecrîd bi peynî nêbo ê do fek grev ra vera nêdê û va: "Destpêk de tecrîdê serê rayberê Apo şermezar kena. Coka ma dest bi çalakî kerd. Ê diyîn zî seba  sererastkerdişê şert û mercê zîndanan o. Zîndanan de binpaykerdişê heqan zêde yê. Gama ke ma kitaban wazenê, nêdanê ma û key zerrîya înan biwazo, o wext danê. Sewbîna  kotayê kitaban zî 5ine ra heta 10an  bi sînor kerdê. Pêwa nê çîyan hetê hîjyenî de zî xeylêk problem estê. Çend embazê ma seba şûbeyê koronayî dinyaya xo bedilnayî. Nika zî embazê ma yê ke rewşa înan giran estê. Çiqas şino tecrîdê zîndanan giran beno. Sebebê heta ke tecrîdê Îmralî û tecrîdê serê heme tepişteyan peynî bo, ma do xoverdayîşê xo dewam bikerê."

 

'Ma pîya eşkenê sîstemê faşîst birijnê'

 

Yazgule peynî de vengdayîşê hîsgêrî kerd û va: "Ma veng danê komel û vanê, tecrîd her ke şêno m akeno binê ablûqa. Bi hîsgêrî nêzdîyê çalakîy ama bibê û ma ten anêverdê. Mam eşkenê nê faşîzmî pîya birijnê. Bi kesêk tena nîno çareserkerdene. Coka ganî şarê ma zî wayîrê çalakîya ma vejîyê û paştdayîş bidê ma."

 

'Wa waştişê domananê ma bêrê qebulkerdene'

 

Dayîka Yazgule, Zehra Şahîn zî wina va: "Wa waştişê domananê ma bêrê qebulkerdene. Ma dayîk ê, zerrîya ma veşêna. Domanê ma zîndanan de û 2 seerî yo kewtê grev. Ma o wext zî zaf dejayî. Nika reyna kewta grevê vêşanîye û şert û mercê înan zî baş nîyê. Êdî bes o domanê ma dinyaya xo bedilnenê. Nê zulm û îşkence rê bes o. Şima înan ra çi wazenê, hende îşkence û teda kenê. Ma nêeşkenê şêrê serdayîşê domananê xo û Nika tena heqê înan ê qiseykerdişê bi telefonî esto û heqî zî destê înan ra girewt. Wa nê zulm û zordarî peynî bikerê."