Rojda Aydin

 

ŞIRNEX - Roniştoxê Sêgirikî dîyar kerdî ke hetê qorîcîyan ra menga teşrîna peyêne û kanûne de 500 pezkovî zêdeyêr ameyê qetilkerdene û dewam de vatî, "No qirkerdişê heywan û xoza bi zanabîyayîş yeno kerdene, ganî ma bêveng nêmanê û wayîrê xozaya xo vejîyê."

 

Qirkerdişê xoza yê dewlete her roje yê newe zêde benê. Talankerdişê xozaya herême de çarçewaya polîtîkayê şerê taybet yeno kerdene. Bi her hawayî talan û texrîpkerdişê xoza herême de dewam keno. Koyê Cûdî, Gabar û Bestayî de hetê leşkeran ra 4 mengî daristanî ameyî veşnayene. Netîceyê şewatî de wareyê pîl yê daristanan veşayî û heme ganeyî xoza dir ameyî çinkerdene. Çarçewaya talankerdişo ke herême de dewam keno nika zî heywanê herême hedef ameyê girewtene.

 

Roniştoxê Sêgirkî û Hemsereka HDPyî ya verê ya Şirnexî Zeynep Unat, ard ziwan ke dewlete Kurdistanî hemverê kurdan û xoza înan bi serran hêriş keno û va: "Binê nameyê asayîşî de daristanê ma bi destê leşkeran yenê veşnayene. Darê ma zî hetê qorîcîyan ra yenê birnayene. No zî heme bi destê qorîcîyan yeno kerdene. Bi nê hêrişan wazenê ke xoza û herra ma çin bikerê. Bi nê talankerdişî wazenê ke kurdan bê herrî û xoza verdê. Herême de nêzdîyê 4 mengî şewat dewam kerd û pêro selahîyetdaran nê şewatî peygoş kerd. Kesî goş nêda dewij û şarê herême. Nê hêrişî bi destê dewlete û bi zanabîyayîş yenê kerdene."

 

'Nêzdîyê 500 pezkovî ameyî qetilkerdene'

 

Zeynepe dewam de wina va: "Herême de binê nameyê, ‘muşahede û cigêrayîşî' de nêzdîyê 500 pezkovî ameyî qetilkerdene. Nê pezkovî zî Koyê Cûdî, herema Besta û dewa Sinahî yê girêdayê Zaxoyî yenê. Bi qetilkerdişê pezkovîyan wazenê ke welatê ma bê heywan verdê û xozaya ma çin bikerê. Seba ke pezkovî zî parçeyêk xozaya ma yê. Sewbîna bi awanbîyayîşê sîstemê qorîcîtî dir hîna zaf qetlîamê xoza ame meydan. Zerecê ke neslê înan ver bi çinbîyayîşî de bî nika hîna bîyê tay.  Tena zerecî ney, maseyê awe de zî yenê qetilkerdene. Çemê Hêzilo ke mabêne dewê Bilika û Avyanî de bi jeneretor û bombayê destan xeylêk maseyî ameyî qetilkerdene."

 

'Kesê ke pezkovîyan qetil kenê wa bêrê cezakerdene' 

 

Zeynepe tewr peyîn wina va: "Hemverê talankerdişê xoza û qetilkerdişê heywanan ma bêveng nêmanenê. Ganî ma hemverê nê caardişan ma vengê xo berz bikerê. Ma nêwazenê xozaya ma bêra talankerdene. Kesê ke nê qirkerdişî kenê bi hawayêk kêyfî kenê. Qorîcî şinê qereqolê herême de destûr wazenê û heywanan qetil kenê. Kesê ke heywanan qetil kenê, nînê cezakerdene. Her het ra xoza yena qetilkerdene û çîyêk zî nîno kerdene. Heywanî zî parçeyêk nê xoza yê. Ganî ma wayîrê xozaya xo vejîyê. Eke ma bêveng bimanê, do rewşe hîna xirab biba. Kesê ke pezkovîyan qetil kenê, wa bêrê cezakerdene. Her hat ra hemverê xoza hêriş kenê. Wazenê xozaya Kurdistanî zî çin bikerê. Ewro tena tîya ney, xeylê şaristanê Kurdistanî de pezkovî yenê qetilkerdene. Bi polîtîka xo her rey qirkerdiş kenê û nika zî heywanan qetil kenê. Ma hemverê qirkerdişan bêveng nêmanê."