MEXMÛR - Mexmûr de bi rayberîya Meclîsê Îştarî grevê vêşanîye ame destpêkerdene. Cinîyê ke tewrê grevî bî bale antî serê tecrîdî û vatî: "Şexsê rayberê şarê Kurdî Abdullah Ocalanî de hemverê şarê Kurdî de tecrîdêk yeno kerdene. Hemverê tecrîdî ganî kurdî bibê yew û hemverê çinkerdişê kurdan têkoşîn bikerê." 

 

Hemverê tecrîdê Rayberê PKKyî Abdullah Ocalan û binpaykerdişê heqê tepişteyan ser o 27ê Teşrîna peyêne zîndanê herême û Tirkîya de grevê vêşanîye bêdem û bidor ameybî destpêkerdene. Seba paştdayîşê çalakî Wargehe Multecîyan ê Şehîd Rustem Cûdî (Mexmûr) bi rayberîya Meclîsê Îştarî yê Mexmûrî ra çalakîya grevê vêşanîye ya bêdem û bidor ame destpêkerdene. Çalakîya cinîyan bi koma 3ine dewam kena. Emîne Şaxî û Oznûr Kaya tewrê grev bî û ercnayîşê xo ajansê ma dir pare kerdî.

 

'Hemverê tecrîdî xoverdayîş' 

 

Emîne, destpêkê qiseykerdişê xo de qalê tecrîdî kerd û va: "Bi serran o hemverê rayberî de tecrîdêk esto. Hemverê tecrîdî şarê Kurdî û tepişteyê azadî her wext mîyanê çalakîyan de bî. Bi rayberîya tepişteyê azadî yê zîndanê vakurê Kurdistanî û Tirkîya de xoverdayîşêk ame destpêkerdene. Dişmin şexsê Rayber Apo de hemverê Kurdan de tecrîd keno."

 

'Ganî Kurdî hêzê xo bikerê yew'

 

Emîne, bale ant serê hêrişê hemverê Herêma Federalî ya Kurdistanî û va: "Dewleta tirkî bi hemkarîya PDKyî wazena ke herême de polîtîkayê çinkerdişî bika. Îxanetê ke verê pey perdî de ameyîne kerdene, ewro eşkera yenê kerdene. Lazim o şarê Kurdî dişmin dir neyî yewbînan dir hêzê xo bikerê yew."

 

Emîne tewr peyîn qiseykerdişê xo de seba grevî vengdayîşê hîsgêrî kerde û va: "Bi taybetî ganî cinîyê Kurdî paştdayîş bidê çalakîya grevê vêşanîye. Seba azadîya Rayber Apo ganî wayîrê xoverdayîşî vejîyê."

 

'Ma do tecrîd pîya bişikinê'

 

Oznure zî qiseykerdişê xo de bale ant serê grevê vêşanîye û va: "Amancê çalakîya ma şiknayîşê tecrîd û azadkerdişê Rayber Apo yo. Tepişteyê azadî seba ke tecrîdo bîyaye peynî bibo, çalakî dayî destpêkerdene. Ma cinîyê wargehî paştdayîş danê çalakîya tepişteyan. Dewleta tirkî wazena ke destkewtişê şarê Kurdî çin bikera. Seba ke ma vera nê planê lêşînan vejîyê, ganî ma bibê yew û pîya hemverê dişminî têkoşîn bikerê."