ENQERE - Rêxistinanê cinîyan vera tepiştişê Leyla Guven nêrazîbîyayîşê xo mojna û vat: ''Leyla Guvena ke vera neheqîyan vejîyena îradeyê ma cinîyan a.''

 

Derheqê tepişîyayîşê Hemsereka Kongreya Komela Demokratîke (KCD) û parlementera Colemêrgî ya Partîya Demokratîke ya Şaran (HDP) Leyla Guvene de Meclîsê Cinîyan yê HDPyî, Meclîsê Cinîyan yê Kongreya Demokratîke ya Şaran (HDK), Meclîsê Cinîyan yê Partîya Herêmê Demokratîkî (DBP), Meclîsê Cinîyan yê KCDyî, Xelisîyayîşê Cinîyan, Endamê Platformê Paştîdayîşî yê Sosyalîstan, Meclîsê Cinîyan yê Sosyalîstan (SKM), Meclîsê Cinîyan yê Partîya Newîye ya Sosyalîstan (SYKP) û Cinîyê Cepgîrî yê Keskî wertax eşkerayî dayî.

 

'Ma nê qerarî nas nêkenê'

 

Eşkerayî de reaksîyon ame ramojnayîş û wina ame vatene: "Qerarê tepiştişî têna vera Leyla Guven nê vera îradeyê pêro cinîyan ameye girewtene û bi nê hawayî cinîyî yenê tersnayene. Leyla Guven vat ma nêşinê cayêk. No welat welatê ma yo û ma do tede sîyaset bikerê. Polîtîkaya teda û zorbazîye do nêeşka verê ma bigêra. Oyo ke do birijo îqtîdarê serdestîya camêrdan o. Ma do vera polîtîkayanê ke dişmenîya kurd û cinîyan kenê sereyê xo nêrê war."