ENQERE - Fatma Ozbay yew cinîyê tepişteyî ya, bi hêvî, bawerî û têkoşîn hemverê nêweşî serê lingan de menda. Fatma pêwa nêweşîya xo ya girane, 23 serrî yo zîndan de yena tepiştene.

 

Hemverê tecrîd û şîdetî heme wareyan de têkoşîn yeno dayene. Nê wareyan ra yew zî zîndan ê. Tepişteyê PKKyî û PAJKî  ke vera binpaykerdişê heqan xoverdayîş kenê, reyna seba hemverê tecrîdê Rayberê PKKyî Abdullah Ocalan û binpaykerdişê heqan ê zîndanan de 27ê teşrîna peyêne dest bi grevê vêşanîye bêdem û bidor kerdî. Nê cinîyanê têkoşer ke fek têkoşînê xo ra vera nêdanê, yew înan ra zî Fatma Ozbay a. Fatma, pêwa nêweşîya giran 23 serrî yo zîndanan de yena tepiştene û fek nê xoverdayîş ra vera nêdana.

 

Ma waşt ke ma hîkayeya têkoşîn û xoverdayîşê Fatma Ozbay (55) a ke bi serran o pêwa nêweşîya qanserî zîndan de yena tepiştene şima dir pare bikerê.

 

Domanîya xo de tedayê dewlete nas kerd 

 

Fatma, Bazîdê Agirî ra ya û 5 domanan ra domana 4ine ya. Fatma domanîya xo ra zulm û tedayê şarê Kurdî vînena. Reyna domanîya xo de hemverê zulmî tevgerê azadî nas kena. Fatma bi xêrê pîyê xo yê şorişgêr pênaseyê "şoriş" û "şorişgêrî" nas kena.

 

Fek karî ra vera dana û bena şorişgêr

 

Fatma, mektebê sereyîn û lîseyî Bazîd de qedênena û dima ra Şaredarîya Bazîdî de bena karmend. Fatma dimayê ke derg karmendî kena, nakokîyê mîyanê sîstemî de zî vînena. Dima ra zî fek kar ra vera dana û seba azadî dest bi têkoşîn kena.

 

Fatma 1994 de reyke bîn xo nas kena 

 

Fatma, wazena ke mîyanê têkoşînî de azadîya şarê xo de ca bigîra, la xeylêk probleman ciwîyena. Fatmaya ke serrê 90î de têkoşîn nas kena, 1994 de birayê aye pêrodayîşêk bi hêzê dewlete dir dinyaya xo bedilneno. Waya Fatma zî 1992 de tewrê PKK bena.

 

Fatma bi naskerdişê PKKyî dir vurnayîş û azadî xo rê kena hedef û xo bi nameyê Raperîn bi name kena. Raperîn manaya serewediratîşî yo. Serewedaritişê Fatma vera rolê ke cinîyan rê ameyo dayene û hemverê şîdeto ke şarî rê yeno kerdene sere wedarnena. Fatma 3 serrî mîyanê PKKyî de ca gêna û hewl dana ke azad biba.

 

28 serrî mîyanê çar dêsan de  

 

Waya Fatma, Gulser Ozbay (Roza) 1992 de yena destbendkerdene û dima ra zî yena tepiştene. Gulsere bi sebebê, "Yewîya dewlete xira kerda" bi cezaya muebetî yena cezakerdene û nika zî Zîndanê Cinîyan ê Şakranî de tepişte ya.

 

Cezaya muebetî ci rê ameye birnayene 

 

Fatma ke 7ê Gulana 1997 de ameye destbendkerdene, yena tepiştene û erşawenê Zîndanê Tîpê M yê Midyatê Mêrdînî. Aye zî sey waya xo Gulsere bi sebebê "Yewîya dewlete xira kerda" bi cezaya muebetî yena muhakemekerdene û dima ra zî hetê dadgehê leşkerî ra bi cezaya muebetî hepsî yena cezakerdene.

 

Sere de surgunê Bayburtî yena kerdene

 

Fatma hetê embazanê xo ra sey kesêka girêdayê cuye yena naskerdene, zîndan de zî bi moralê xo yê baş yena naskerdene. Zîndanê Midyatî de bi way axo dir manena. Fatma û Gulsere ke serrê dergî eynî zîndan de mendî û 2012 de zî surgunê Zîndanê Tîpê M yê Bayburtî yena kerdene.

 

Fatma uca de zî demêk derg bi waya xo Gulsere dir eynî zîndan de manena. Uca de têkilîyêk zêdeyêr germ mabêne înan de virazêna. Fatma ke hetê embazanê xo sey cinîyêk fedakar yeno zanayene reyke bîn surgunkerdene û erşawenê Zîndanê Tîpê E yê Cinîyan ê Erziromî.

 

Erzirom de yena tecrîdkerdene

 

Zîndanê Erziromî seba Fatma vuryeno cayê tecrîdî. Fatma uca de hucreyê yew kesî de manena û qanserê cicikan kewena. La ne waya fatma û ne zî embazêke aye erşawenê verê ci. Fatma bi tena serê xo nêweşîya qanserî derman kena. Fatma êdî nêeşkena bi tena sereyê xo lazimîyê xo bi bîyara û tesîrê kemoterapî zî ser de zêde beno.

 

Porê xo bi mûçinike tira kena

 

Fatma pêwa ke dejêk pîl ancena, dermanê aye hetê gardîyanan ra nînê dayene. Fatma seba ke kemoterapî vînena, porê aye rişeno û wazena ke porê xo tira bikero. La îdarekarê zîndanî meqes nêdanê ci ke porê xo biqesna û bi mûçinke porê xo tira kena. O wext waye aye Gulsere zî Zîndanê Şakranî ya Cinîyan ê Îzmîrî de ya. Pêwa ke wazena şêro verê waya xo zî destûr ci rê nîno dayene û binê tecrîdî de dermankerdişê aye dewam keno.

 

Xeylêk berardişê edebîyatî zî nusena

 

Fatma, dimayê ke rewşa weşîya aye ver bi başî şina, erşawenê verê waya aye. Fatma ke 23 serrî cuya xo zîndan de derbaz kerda, xeylêk berardişê aye ke hema nêresayê verê destê wendoxan zî estê. Fatma nuşteyê xo tewr zêde sey makale, şîîre û hîkaye girewtê dest. Sewbîna Fatma serê 4ê Nîsane de zî şîîrêka bi nameyê "4ê Nîsane" nuşta.