Medya Uren

 

MÊRDÎN - Tepişteya sîyasî Filîz Işika ke Zîndanê Cinîyan ê Tîpê T yê  Amedî de manena, qiseykerdişê bi telefonî de keyeyê xo rê dîyar kerda ke, "Embazê ma yê ke hemverê tecrîdî dest bi grevê vêşanîye kerdê, rastê şîdet û tedayan yenê. Seba her yewî/e cezaya disiplînî yena dayene."

 

Grevê vêşanî ke hemverê tecrîdê girankerde yê serê Rayberê PKKyî Abdullah Ocalanî de yeno kerdene de roja 22yîn de dewam keno. Çalekî her ke şino zîndanan û teber de vila beno. Sereka verê ya Partîya Herêmê Demokratîk Filiz İşika ke zîndanê tîpê T yê Amedî de manena, pêvînayîşo ke bi rayîrê telefonî keyeyê xo dir kerda, bale ant serê çalekîyan û va, hemverê çalakîyê ke ma kenê de cezaya disîplînê danê ma. Dayîka Filîze, Alîye Işik zî vengdayîş kerd ke kes vera tepişteyan bêveng nêmano û sere wedarinê.

 

'Ceza ma rê varnenê' 

 

Alîye bale ant serê qiseykerdişê bi telefonê ke tewr peyîn kênaya xo dir kerda û va: "Mi bi kênaya xo dir telefon de qisey kerd. Kênaya mi va, 'Ma baş ê, çalakî dewam kenê. Nika komêke newe dest bi grev kerd. Hemverê çalakîyan de reaksîyonê îdarekarîyê zîndanî zêde yo. Xeylêk embazê ma seba ke dest bi grev kerdê, yenê cezakerdene. Xora tena heqê qiseykerdişî ma yê telefonî esto, seba sebebê grevî o zî qedexe kenê û cezaya hucreyî danê.' Tecrîd serê ma hemine de kenê. Bi hezaran ciwanê kurdî seba nasnameyê xo zîndanan de yê."

 

'Ma dayîkî êdî nêeşkenê wedarnê' 

 

Dimayê qiseykerdişê bi telefonî dir ma bî mêmanê keyeyê Filîze. Dayîka Filîze, Alîye hêrsê xo nênimit û va, Homa heqê ma înan rê nêverdo. Alîye dima ra wina va: "Tepişteyê sîyasî vera tecrîd û pêro bêheqîyan dest bi grev kerdî. Grev heqê înan o û ê zî yenê astengkerdene. Ne tecrîd yeno şikinayîş, ne zî destûr danê ke vengê xo berz bikerê. Ma no edalet o. Ma grev zî suc o êdî. Seba ke kewenê grev cezayê giranan înan rê birnenê. Ma dayîkî êdî sebrê ma nîno ma nê vatişan bieşnawê. Domanê ma yenê tecrîdkerdene."

 

'Eke ma bêveng bimanê do domanê bêrê îşkencekerdene' 

 

Alîye bale ant serê tecrîdî û wina va: "Tecrîd sucê merdimayî yo. Heta ke şima bieşnawê ma do nê çî vajê. Ez seke dayîka tepişteyan veng dana her kesî ke bibê vengê tepişteyan. Eke ma tecrîd peynî bikerê, ma do o wext bieşkê qalê aştî bikerê. Coka lazim o ma mil bidê yewbînan. Eke ma bêveng bimanê do ewro zî ceza bidê domananê ma û înan îşkence bikerê."