ENQERE - Kênaya Muhlîse Karaguzela 63 serrî ke zîndanê Bunyan ê cinîyanê Kayserî de manena û xeylêk nêweşîyê aye yê kronîk yê seke tansîyon, şekir û boye estê Zîlane Karguzel dîyar kerd ke dayîka aye nêeşkena boye bigîra û bida û ganî zince xo ra bêra amelîyatkerdene.

 

Tepişteyê nêweşan ra ke lîsteyê ÎHDyî de ca gêna Muhlîse Karaguzela 63 serrî ke zîndanê Cinîyan ê Bunyanê Kayserî de manena, kênaya Muhlîse, Zîlane derheqê dayîka xo de ercnayîş kerd. Zîlane dîyar kerd ke dimayê ke dayîka aye berdê nêweşxane, aye 14 rojan kerdê karantîna û pêwa ke 14 rojî aye qedîyayê zî karantîna ra nêvetê û 20 rojî yo binê karantîna de yena tepiştene.

 

'Ver bi mergî ya' 

 

Zîlane ard ziwan ke serrêke û nîm o dayîka aye tepişnayeya û va xeylêk nêweşîyê dayîke aye kronîk estê û va: "Nê nêweşîyê dayîke mi bi raporan zî ameyê ispatkerdene. Sewbîna dayîka mi hetê nefesgirewtişî de zî zehmetî ancena. Doktoran va ke ganî zinca xo ra emalîyat biba. Doktorî vanê ma tena rewşa lezabeze de eşkenê emalîyet bikerê. La rewşa dayîka mi zî acîl a. Gama ke merdim nêeşko boye bigîro û bido, bênefes maneno. Dayîka mi seba k eşîya nêweşxane û ameya 14 rojan kerdê karantîna. Labelê dayîka mi bi 14 rojî karantîna de ya."

 

'Dayîka mi tay mendo kor biba'

 

Zîlane va ke şekirê dayîka aye xeylê zêde yo, la nêeşkena xo biresna dermanan û va: "Dimayê ke dermanê dayîka mi rojane xebitnena qedênê, xeylê erey dermananê ci danê. Dayîka mi çimê aye ameyo sewîyeya korbîyayîşî û sebebê ci zî nêweşxane yo. Tepişteyî hetê nêweşxane ra zaf tengayî ancenê. Şekirê dayîka mi seba ke zaf zêde yo, dano çimê aye ro. Raporê dayîka min ke nêeşkena zîndan de bimana zî esto la pêwa nê raporî zîndan de manena."

 

'Bi hetkarîya embazanê xo serê lingan de manena'

 

Zîlane va seke dişminan nêzdîyê tepişteyê sîyasîyan manenê û va: "Dayîka mi bi hetkarîya embazanê xo cuya xo dewam kena. Seba rewşa pandemî ma nêeşkenê şêrê serdayîşê aye zî. Ma tewr peyîn 3 mengî verê şîbî serdayîşê aye. Goştê zincê aye ra çimê ci zî masa bî. La dimayê ke berdê nêweşxane zî doktor vato m anêeşkenê emalîyet bikerê. Dayîka mi eynî wextî de lîsteyê nêweşê tepişteyê ÎHDyî de ya û xeylêk raporê aye ke vanê, nêeşkena zîndan de bimana estê. Hem mi, hem avûkatê aye, hem zî dayîka mi ma waştişname da ke bêra emelîyatkerdene."

 

'Ma nêwazenê tu çalakî bi merdiş netîce bibo' 

 

Zîlane bale ant serê grevê vêşanîye û va: "Ma nêwazenê ke tu çalakî bi merdiş netîce bibo. Wa selahîyetdarî na babete de game bierzê û waştişê tepişteyan ê meşrû bi ca bîyarê. Bi serran o xeylêk embazê ma seba rojeyê mergî û grevê vêşanîye dinyaya xo bedilnayî. Ma êdî nêwazenê ke tu kes dinyaya xo bibedilno. Wa Wezaretê Dade ganî waştişê tepişteyan bi ca bîyarê."