AMED - Nika koma 5in grevê vêşanîye de ya û grev 24 rojî yo dewam keno. Dayîka Rojbîn Yakûta tepişteyî Şazîme Yakût, bale ant serê rewşa tepişteyan û va: "Ganî wezîfedarî goş bidê waştişê tepişteyan seba ke waştişê înan waştişêko meşrû yo. Ma tepişteyanê xo bi tena nêverdenê."

 

Zîndananê herême û Tirkîya de hetê tepişteyê PKKyî û PAJKî ra hemverê binpaykerdişê heqê tepişteyan û tecrîdê hemverê Rayberê PKKyî Abdullah Ocalanî grevê vêşanîye yê bêdem û bidor 27ê teşrîna peyêne de ame destpêkerdene. Her 5 rojan ra reyke komêke çalakî dewr gêna. Nika koma 5ine grev de ya. Tepişteyî bi rayîrê telefonê xo resenê keyeyanê xo û mesajê xo rayaûmûmî rê neql kenê. Nê tepişteyan ra yew zî Rojbîn Yakût a û Zîndanê Hûmara 3ine yê Tîpê T yê Bunyanî de manena ya.

 

Rojbîne serra 2015 de Serêkanî de ameye tepiştene. Nêzdîyê serrêk zîndanê Rihayî de mende. Uca ra zî neqlê zîndanê Tarsûsî kerdî. Labelê dimayê serre û nîm ra uca ra zî surgûnê Kayserî kredî. Binpaykerdişê heqê zîndanan ê Zîndanê Kayserî zî dewam keno. Rojbîne mîyanê 5 serran de 3 rey tewrê çalakîya grevê vêşanîye bîye. Nika zî bi destpêkerdişê çalakîya 27ê teşrîna peyêne ra koma yewin de ca girewte. Dayîka Rojbîne, Şazîme Yakût derheqê rewşa kênaya xo û çalakîya ke ameye destpêkerdene de vengdayîşê hîsgêrî kerd.

 

'Do ê şert û mercan de senî baş bibê'

 

Şazîme destpêkê qiseykerdişê xo de bale ant serê şert û mercê zîndanî û va: "Zîndanan de xeylêk heqî yenê binpaykerdene. Werdê înan zaf xirab o. Cayo ke ganî 6 kesî manenê, 10 kesî ci de manenê. Yê ke kapasîteyê qawîşê 10 kesî yê zî 20 kesî manenê. Hetê pakitî de xeylêk problemî estê. Pandemî de maske û hacetê dezenfekteyê kêm danê tepişteyan. Nê şert û mercan de do senî tepişteyî xo nêweşî ra bipawê. Sewbîna teda serê înan de esto. Wexto ke nêweş kewtî zî înan rê baş nêewnîyenê. Yê nêweşê zî kenê hucreyan. Pêwa nînan cezaya disîplînî zî danê înan. Rojbîne Tarsûsî 3 rey cezaya dîsîplînî girewte û bi no hewa înfazê aye ame veşnayene. Cezaya aye derg kerdî."

 

'Ma tepişteyan tena nêverdenê' 

 

Şazîme dîyar kerd ke zîndanan de tecrîdêk pîl esto û va: "Grevê vêşanîye ke ameyo destpêkerdene, xora do no grev dewam bikero ke heta waştişê tepişteyan bi ca bîyarê. Heta no tecrîd nêro çareserkerdene de pêro tepişteyî fek grev ra vera nêdê. Ganî pêro keyeyî paştdayîş bidê. Tecrîd serê pêro tepişteyan esto. 2 serrî verê zî kewtibî grev, o wext ma senîn xo ver dabî, ma do reyna verê domananê xo de bê û paştdayîş bidê înan. Waştişê înan waştişêk meşrû yo. Ma do zîndanan ten anêverdê. Seba ke ma hetkar bibê çi destê ma ra bêro ma do bikerê."