COLEMÊRG - Endamê Meclîsê Cinîyan ê HDPyî yê Colemêrgî bale antî serê grevê vêşanîye û vatî: "Seba peynîkerdişê tecrîdî, ganî ma goş bidê waştişê tepişteyan. Seba waştişê tepişteyan bi ca bêro zî ganî yewîye biba."

 

Hemverê tecrîdê Rayberê PKKyî Abdullah Ocalanî û binpaykerdişê heqê tepişteyan, herême û Tirkîya de grevê vêşanîye ame destpêkerdene. Tepişteyî bi rayîrê keyeyê xo pêameyîşê xo û amancê xo rayaûmîmî rê neql kerdî. Seba paştdayîşê çalakî, keyeyî kewtî mîyanê hewldayîşan. Derheqê grevê vêşanîye yê bêdem û bidor endamê Meclîsê Cinîyan ê Partîya Demokratîke ya Şaran (HDP) ya şaristanî Sînem Duran û Emîne Armût fikrê xo ardî ziwan û vengdayîşê hîsgêrî kerdî.

 

'Hemverê tecrîdî yewîye' 

 

Sîneme, dîyar kerd ke nika pandemî esto û rewşe tehluke ya û wina va: "Vîrûsê korona her rojî tewr zêde beno û no çî zî merdimî keweno mîyanê endîşeyan. Nika embazê ma yê tepişteyî dest bi grev kerdî û no çî na sewîye de rewşêke krîtîk a. Ma nêwazenê zîndanan de şehadet bibo. Seba ke demêk derg o rewşa zîndanan rojeve de ya, bêîmkanîyê zîndanan û nêzdîbîyayîşê wezîfedaran zîndan de hîn abi tehluke kerd. Beno ke nêweşî hemverê tepişteyan de tesîrêk negatîf bikero."

 

Sîneme, tewr peyîn qiseykerdişê xo de vengdayîşê paştdayîşî kerd û va: "Ganî şarê Kurdî bibê yew, vindertişêk yewî ramojno û wayîrê tepişteyan vejîyo. Tecrîd tena hemverê Abdullah Ocalanî ney hemverê şarê Kurdî bi ca yeno. Coka zî lazimî bi yewîye esta."

 

'Ma bibo vengê tepişteyan'

 

Emîne zî dîyar kerd ke grevê vêşanîye nika kewt roja xo ya 23in û wina va: "23 rojî yo tepişteyî grev de yê, o wext eştî serê koxuşan û cigêrayîş ameyî kerdene. Pêro çîyê taybet yê tepişteyan ameyî komkerdene. No çî rewşa tepişteyan ramojneno. Nika wextê pandemî de tepişteyî bi dest grev kerdî û her ke şino nêweşî zî zêde bena. No çî seba tepişteyan tehluyêk pîl o. Hemverê nê ganî tecrîd bêro wedaritene."

 

Emîne, dîyar kerd ke tena hemverê Abdullah Ocalan ney hemverê şarê Kurdî tecrîdêk esto û wina va: "Ma nêwazenê zîndanan ra cenaze vejîyê. Ma wazenê ke tecrîd bêro peynîkerdene. Ma sey Meclîsê Cinîyan ê HDPyî nê prosesî de çi destê ma ra bêro ma do bikerê û ma do bibê vengê tepişteyan."