MEXMÛR - Seba paştdayîşê grevê vêşanîye Mexmûr de bi rayberîya Meclîsê Cinîyan ê Îştarî, grevê vêşanîye ame destpêkerdene. Cinîyê Mexmûrijî bale ant serê çalakîyan û vatî: "Çalakîya grevê vêşanîye ke tepişteyê zîndanî azadî dayê destpêkerdene seba m arexneyêk pîl o. Ganî ma zî wayîrê çalakîye vejîyê û bibê vengê tepişteyan."

 

Vera tecrîdê hemverê Rayberê PKKyî Abdullah Ocalanî û tedayê hemverê tepişteyan de zîndananê herême û Tirkîya de 27ê Teşrîna peyêne grevê vêşanîye yê bêdem û bidor ame destpêkerdene. Cinîyê Wargehê Multecîyan ê Şehîd Rustem Cûdî (Mexmûr) tecrîdo girankerde şermezar kerdî û fikrê xo ma dir pare kerdî.

 

'Lazim o ma bibê çiqliqê adirî'

 

Cemîle Korkmaz bale ant serê tecrîdî û va: "Serra 2011 de hemverê Rayberê ma tecrîdêk giran kerde dewam de yo. Ma sey cinîyê wargehî nê tecrîdî şermezar kenê. Ma şarê Kurdî kêfweşê ke rayberêk ma wina esto. Lazim o ma cinîyê kurdî dorê rayberê xo de bibê çiqliqê adir."

 

'Ma pîya tecrîd bişiknê'

 

Cemîleye tewr peyîn wina dewam kerd: "Tepişteyê azadîye bi destpêkerdişê çalakîya grevê vêşanîye rexneyêk pîl bi ma kerdî. Lazim o ma sey şarê Kurdî vengê xo berz bikerê û rêxistinbîyayîşê xo xurt bikerê ke m arayberê xo azad bikerê. Eke bîyayîşêk ma çinbo ma nêeşkenê vajê ma azad ê."

 

'Bêvengîye rê êdî bes o'

 

Sabrê Îşlek zî tecrîdo girankerde şermezar kerd û va: "Ma tena wazenê bi hawayêk azad bi rayberê xo dir biciwîyê. Êdî bes o! Wa her kes bikewo mîyanê hewildayîşan û vengê xo bikero yew ke ma bieşkê rayberê xo azad bikerê. Heta ke ma rayberê xo mîyanê xo de nêvînê, ma do çalakîyanê xo nêvindernê. Ewro rayberê merdimayî binê tecrîdêk giran de yo û kes vengê xo nêkeno. Ganî ma nêkerê xo vîr ra ke eke ma ameyê na sewîya şehîdê Kurdistanî û Rayber Apo yo. Ma do heta peynî zî paştdayîş bidê tepişteyê zîndanan."