WAN - Dayîka Mervan Abîyo HPGyij ke Colemêrg de 14ê Hezîrane de pêrodayîşêk qewimya de dinyaya xo bedilna Songule Abî, reaksîyon nêdayîşê cenazeya lajê xo da û va, "Parçeyêk lajê mi bimano zî, ez cenazeya ey wazena."

 

Cenazeya Mervan Abîyo HPGyij ke 14ê Hezîrane de pêrodayîş de dinyaya xo bedilna, pêwa dayîşê testê DNAyî ke verê bi di mengan ameyo dayene zî hema nêdayê keyeyê ey. Dayîka Mervanî, Songule Abî reaksîyon vera nêdayîşê cenazeya lajê xo da û wina va: "Lajê mi 14ê Hezîrane de Colemêrg de dinyaya xo bedilna. Dimayê nê seba ke ma cenazaya lajê xo bigîrê, ma waştişname da dozgerî. Dozgerî tesdîq kerd ke lajê mi pêrodayîş de dinyaya xo bedilnayo. Ma ra vatî, 'şima şêrê ma do zanayîş bidê şima.' Serê muracatê ma rê 52 rojî derbaz bi la hema zî cenaze nêdayê ma. No îşkence yo."

 

'Ez wazena gorêk ke ser de dua bikerê bibo'

 

Songule va ke aye wazena gorêk lajê aye ke ser de dua bikero bibo û va: "Bi seyan keyeyê ke cenazeyê merdimanê xo nêgirewtê estê û cenazeyê ke gorê înan ameyê texrîbkerdiş estê. Ma nînan zî televîzyon, rojname û ajansan ra taqîb kenê. Nêdayîşê cenazeyan yan zî ereydayîşê înan, keyeyan rê îşkence yo. Wazenê ke ma fek cenazeyan ra vera bidê. La ê domanê ma yê. Ma eşnawit ke lajê min dir ciwanêk bîn dinyaya xo bedilna yo. Werrekna bi cenazeya lajê mi dir ê ciwanî zî biameyîne dayene. Pêro domanê ma yê. Dayîkê Kurdî şer nêwazenê û nêwazenê ke domanê înan bêrê kiştene. Ma hemverê şerê ke bi israr yeno waştene, aştîye wazenê."

 

'Eke parçeyêk zî mendo ez cenazeya lajê xo wazena'

 

Songule va ke dozgerî biwaza eşkena ewro zî netîceyê testê DNAyî bida û wina va: "Eke parçeyêk zî bedenê lajê mi ra mendo, ez cenazeya ey wazena. Hema dozgerî cewabê ma nêdayo. Ma çîyêk bîn nêwazenê. Keyeyî perçeyêk bedenê domananê înan bimano, wazenê."