AMED - Hemverê texrîpkerdişê goristanan, keyeyan reaksîyonê xo ardî ziwan û vatî: "Nê hêrişî serê hiş û vîrê şarê Kurdî yo. Amanc tena goristan nîyê, amanc çinkerdişê vîrê komelî yo."

 

Serrê peyînan de vera goristanan polîtîkayêk taybet yeno kerdene. Goristanê ke cenazeyê PKK'yî, YPG'yî û YPS'î estê xeylêk rey bi metodê cîya ameyî texrîpkerdene. Bi taybetî zî goristanê Amed, Mêrdîn, Şirnex, Wan, Sêrt û Colemêrgî ameyî rijnayene. Sewbîna nê prosesî de 282 cenazeyê PKKyijan Goristanê Xerzanî ra amebî vetene û înan berdibî Kîlyos de binê peyerayîr de nimitibî. Keyeyê ke seba pakkerdişê Goristanê Şehîd Harûnî verê xo dabî Lîceyê Amedî, reaksîyonê xo hemverê texrîpkerdişê goristanan ardî ziwan.

 

'Ma wazenê goristanê xo pak bigîrê'

 

Turkane Bîlîr ke pakitîyê gorê lajê xo kerdêne va: "Demo ke ma yenê muracatê goristanan wazenê gorê xo pak bikerê. La goristanê ma ameyî texrîpkerdene. Ma nêzanê ke kam ci gorê ma yo. Demo ke ez kerrayê şikte vînena, ez vana qey newe ra şîyo rehm. Na rewşe raştî zî ma dejneno. Kerrayê gorê lajê mi çend rey şiknayî. Ez her wext yena dorê mezelî pak kena. Merdanê ma ra çi wazenê. Homa heqê ma înan rê nêverdo."

 

'Merdimayîya înan ça de ya?'

 

Endama îdarekarîya MEBYA-DER’ê Meryem Soylu qiseykerdişê xo de bale ant serê bêtehemûlî û va: "Ma çi vatiş vajê zî qîm nêkeno. No wehşeto ke serê goran de kenê, rewşêke şermezarkerdene yo. Dişmin tehamûlê goristanan nêkeno. Ê keyeyê ke wazenê serdayîşê goristanê domananê xo bikerê, zulm bi înan kenê. Dewleta ke vana heqê merdiman pawena, vindertişêk hemverê huqûqî û hemverê dîn ramojnenê. Goristanê ma texrîp keno. Merdanê ma mezelan ra vejenê, veşnenê, dewaya esteyan kenê. Ça edalet û merdimayîyê înan ça de yo? La ez vana no vindîkerdişê înan o."

 

'Ma wayîrê erjanê xo vejenê'

 

Meryeme dîyar kerd ke birînê dayîkan kûr kenê û wina vatî: "Ma qey dayîkê înan çin ê ke nê hêrişê wehşetî serê dayîkan kenê. Wehşetê înan wina bîyo zêde ke bi kargo esteyan erşawenê. Ma do nê zulmî senîn xo vîr ra bikerê? Ez veng dana şarê Kurdî û keyeyan wa wayîr erjê xo vejîyê. Wa deweta tirkî baş bizano ke ma fek erjê xo ra vera nêdanê."

 

'Amanc çinkerdişê vîrê komelî yo'

 

Hemsereka Partîya Demokratîke ya şaran (HDP) ya Rêzanê Amedî Fatma Kavmaz zî dîyar kerd ke wehşetêk wina qet nêameyo vînayene û wina va: "Texrîpkerdişê goristanan tesîrêk negatîf serê keyeyan de keno. Nê hêrişî serê hiş û vîrê şarê Kurdî yê. Amanc tena rijnayîşê goristanan nîyo. Eynî wextî de çinkerdişê vîrê komelî yo."