BEDLÎS - Dayîka Hacer Karaya Zîndanê Cinîyan ê Qeyserî de manena, Hurî Kara dîyar kerd ke seba çalakîya zîndanan de merg çinbo, ganî dewlete çareserîyêk bîvîna û seba çalakîya vengdayîşê paştdayîşî şarî kerd.

 

Çalakîya grevê vêşanîye ya hemverê tecrîdê serê Rayberê PKKyî Abdullah Ocalan û binpaykerdişê heqan yê zîndanan de 27'ê Teşrîna peyêne ame destpêkerdene, bi koma 5in berdawam keno. Dayîka Hacer Karaya Zîndanê Cinîyan ê Qeyserî de manena, Hurî Kara dîyar kerd ke caardişê welatî ra dewlete berpirsiyar a û va: "Zulm berdawam keno. Ganî her kes hemverê zulmî wirzo serê lingan û vengê xo berz bikerê."

 

'Tepişteyî nêeşkenê binpaykerdişê heqan bi telefon bivajê'

 

Hurîye, dîyar kerd ke kênaya aye dimayê ke ameya tepiştiş, tena reyke aye dîya û va: "Qiseykerdişê bi telefon xeylêk kilm o. Do 10 deqeyan de çi vajê. Heta ke ma vanê şima senîn ê, qedêno. Lazimîyê înan zaf ê û nînê bi ca ardene. Wexto ke ma bi telefon qisey kenê, gardîyanî serê înan de vindenê û nêeşkenê rehet qisey bikerê. Mîyanê çar dêsan de rewş xidar o. Nêverdenê bi telefon zî derdê xo vajê."

 

'Gardîyanî teda tepişteyan rê kenê' 

 

Hurîye va ke zîndanan de heqê awe û ceryanî zî tepişteyan rê gênê û wina va: "Ma nêzanê domanê ma zîndanan de çi wenê û çi şiminenê.  Dewlete dinya ra vana ke ê ewnîyenê tepişteyan ra la zûr a, wa kes nê çî ra bawer nêkero. Keyeyê tepişteyan lazimîyê înan bi ca anê. Sewbîna şîyayeyê zîndanan zî tepişteyan ra gênê. Ma nêzanê domanê ma çi rewşe de yê. Ma zî însan ê. Çîyêk domananê xo ra nêwazenê, wa domananê ma rê zî nêwazê. Eke ma rê çi bidê ciwîyayîş wa ê zî biciwîyê. Wa biciwîyê ke ma fam bikerê."

 

'Mîyanê çar dêsan de cayêk boye bigîrê çin o'

 

Hurîye dewam de wina va: "Mektubê ke domanê ma rê erşawenê, nêresenê ma. Tu sebebê nê caardişan çin o. Tu çîyêk nêvanê û ma nêzanê ke domanê ma çi rewşe de yê. Domanê seba teda kewenê grev. Ma kitab û cilan domananê xo rê erşawenê la nêdanê înan. Domanê ma mîyanê çar dêsan de yê û cayêk boye bigîrê çin o. Domananê ma kenê zîndanan û vêşan verdenê. Êdî bes o wa dewlete çareyêk bivîna."

 

'Berpirsîyar caardişê welat dewlet a'

 

Hurîye tewr peyîn wina va: "Caardişê welatî ra dewlete berpirsîyar a. Dewlete berpirsîyarê întîharê ke yenê kerdene, kesê ke vêşan manenê û heme probleman a. Ganî her kes wirzo serê lingan û hemverê zulmî de pîya têkoşîn bikerê. Eke wina nêbo, peynîya zulmî nîna."