AMED - Aktîvîsta TJAyî Fîgen Ektî ke seba falîyetê Komeleya Cinîyan a Rosa ke bi îdiayê, “endama rêxistine ya” tepiştebî, ameye tehlîyekerdene.

 

Aktîvîsta Tevgerê Cinîyê Azadî (TJA) Fîgen Ektî seba falîyetê Komeleya Cinîyan a Rosa îdare kerd, 14ê temmuze de dimayê ke ameye destbendkerdene, 18’ê temmuze de bi îdiayê “endama rêxistine ya” amebî tepiştene. Roniştişê diyîn ê dewaya Fîgene Ektî Dadgeha Cezaya Giran ya 10in ê Amedî ame kerdene. Ektî, Zîndanê Amedî yê Cinîyan bi rayîrê dîmen û veng (SEGBÎS) beşdarê roniştiş bî. Avûkatê Fîgene, Mehmet Oner, Onder Alçîçek û Gulşen Ozbek roniştiş de amade bî û keyeyê Fîgene roniştiş taqîb kerdî.

 

Roniştiş de Fîgene bi kurdkî pawitişê xo kerd û îdiayê serê xo red kerd û va ke bingeyê îdayan çin o. Avûkatan zî pawitişê miwekîla xo kerdî û hemverê îdiayan vejîyayî û waştî ke bêra veradayene.

 

Heyetê dadgehe demo ke tepiştişê yê Fîgen Ektî girewt verê çiman û qerarê tehlîyekerdişî da. Roniştiş taloqê 7’ê nîsana 2021 ame kerdene.