ÊLIH - Muracatê keyeyê Cuma Îmen ê HPGyîj yê seba vînayîşê cenazeya ci yeno îdakerdene, pêrodayîşêk Elkê de dimayê ke sax ameyo girewtene û ameyo înfazkerdene, bê netîce manenê. Dayîka Cuma Salîha va ke esteyê lajê xo wazena.

 

Herêma Faraşîn a qezaya Elkî ya Şirnexî serra 2017'an de menga temmuze de operasyonêk leşkerî amebi kerdene. Dimayê operasyonî HPGyî eşkerayîyêk dabi û vatib ke 6 HPGyijan dinyaya xo bedilnayî. Sewbîna Walîtiya Şirnexî zî 23'yê Temmuza 2017'an de dîyar kerdib ke eynî herême de di ci ra cinî, pêroyî de 6 kesî dinyaya xo bedilnayê.

 

Dimayê eşkerayî, vîdeoyêk serê medyaya dîjîtal de ame parekerdene ke wextê operasyonî de Cuma Îmeno HPGyij demo ke yeno tepiştene, leşkerî ci ra vanê, "Vaje ez teslîm bîya û leşkeran tu çîyêk xirab bi mi nêkerdo." La Cuma zî vano, "Danê mi ro, xeylêk o danê mi ro." Serê nê qiseykerdişî de leşkerî vîdeo padanê û a roje ra nat xebere Cuma Îmen ra nîna girewtene.

 

'Keyeyî gerre kerd'

 

Goreyê îdayan, Cuma dimayê vîdeo ameyo tepiştene û bi demêk kilm de ameyo înfazkerdene. Dimayê dîmenê serê medyaya komelî yê Cuma Îmen (Koçer Devrîm), Êlih de muracatê ÎHD kerdî. Keyeyî dîyar kerd ke dimayê hedîseyê 24'ê Temmuze tu zaneyîş înan rê nêameyo dayene û ê zî wazenê cenazeya lajê xo bigîrê. Keyeyî dimayê muracatê ÎHDyî derheqê berpirsîyaran de gerre kerd. Pêwa ke keye gerre kerdo zî tu zanayîş keye rê nêameyo dayene.

 

'Ez esteyê lajê xo wazena'

 

Dayîka Cuma, Salîha Îmen, wina vat: "Heta nika tu zanayîş nêdayê ma. Ça de yo, merde yo yan zî sax o ma nêzanê. Dîmenêk ma dî bi, leşkeran ey tepiştip. Ma şî cenazeya xo waşt. La tu zanayîşêk zelal nêdayî ma. Ne vanê ma kişto û ne zî zanayîşêk danê ma. Xora kiştê. Serê cenaze de kay kenê û heqaret bi ma kenê. Kesê ke Homayî ra bitersê, nêeşkenê nê çî bikerê. Ez esteyê lajê xo wazena û wazena gorêk ey bibo."