AMED - Sîyasetmedarê cinî yê Amedî derheqê grevê vêşanîye yê bêdem û doragêrayîş qisey kerdî û vatî: "Seba ke grevê vêşanîye bi peynî bibê, ganî tecrîdê serê birêz Ocalan bişikîyo. Azadîya şarê Kurdî girêdayê azadîya Abdullah Ocalanî ya. Ma vera tecrîdî vengdayîşê yewîye kenê."

 

Bi seyan tepişteyê PKK û PAJKî hemverê tecrîdê serê Rayberê PKKyî Abdullah Ocalan û binpaykerdişê heqê tepişteyan, 27’ê teşrîna peyêne de, dest bi çalakîya grevê vêşanîye ya bêdem û bidor kerdî. Nika koma çarine çalakî de ya. Tepişteyî bi rayîrê keyeyê xo dîyar kerdî ke heta ke çalakî nêreso, amancê xo do çalakîya xo dewam bikerê. Sîyasetmedarê cinî yê Amedî bale antî serê grevê vêşanîye û ewnîyayîşê xo ajansê ma rê qal kerdî.

 

'Ganî cinî hemverê tecrîdî têkoşîn bikerê'

 

Îdarekara DBPyî Yasemîn Akengîn bale ant serê polîtîkayê tecrîdî yê hemverê Abdullah Ocalanî û va ke: "Serra vîyarte Leyla Guven zî bi eynî amancê dest bi grevê vêşanîye kerdib û cinîyan berpirsîyarîyêk pîl girewtib. Parlamenterê cinî yê HDP’yî, aktîvîst û dayîkan hemleyêk eştî, paştdayîş dayî grevê vêşanîye. Grevê vêşanîye tecrîd bi hawayêk şikna, vengêk vejîya werte. Ez umîd kena ke aştî û çareserîyêk mende bêro peydakerdene. Cinî ganî hemverê nê tecrîdî nêverdê. Ganî nê têkoşîn de bi hawayêk aktîf ca bigîrê. Vengê mi seba cinîyan o yo ke her ware de vera tecrîdî têkoşîn bikerê."

 

'Ganî no tecrîd bêro şiknayene'

 

Îdarekara şaristanî ya HDPyî Melîha Gurluk va ke tecrîd tewr zêde serê cinîyan de bi tesîr o û wina va: "Seba şiknayîşê tecrîdê birêz Abdullah Ocalanî, tepişteyî dest bi grevê vêşanîye kerdî. Nê prosesî de şûbeyî de grevê vêşanîye do giran bo. Ma mîyanê endîşeyan de yê û ma êdî wazenê ke tecrîdê serê Birêz Ocalan û şarê Kurdî êdî werte ra wirzo. Tepişteyî mîyanê şert û mercê giran de ciwîyenê. Tedawîyê tepişteyê nêweşna nîno kerdene. Netîceyê nêtedawîkerdişî de xeylêk ci dinyaya xo bedilnayî. Ganî no tecrîd bêro şiknayene."

 

'Vera nê tecrîdî yewbîyayîş lazim o'

 

Îdarekara qezaya Rêzanî ya HDPyî Sûna Guneş bale ant serê girîngîyê azadîya Abdullah Ocalan û wina va: "Seba ke grevê vêşanîye peynî bê, ganî no tecrîdo giran serê birêz Ocalanî ra bêro wedaritene. Azadîya şarê Kurdî girêdayê azadîya Abdullah Ocalanî ya. Ez hemverê tecrîdî vengdayîşê yewîye şarî kena."