ENQERE - Meclîsê Cinîyan ê HDPyî derheqê hemleyê ke medyaya dîjîtale de tacîz û şîdetê vera cinîya teşhîr kena, eşkerayîye daye û vat: ''Êyê ke do bêveng bimanê cinîyî nê kerdox ê. Ganî hewnê cinîyan nê ê tacîzkeran biherimîyo.''

 

Meclîsê Cinîyan ê HDPyî derheqê hemleya 'Me too' ya ke medyaya dîjîtale ser o tacîz û şîdetê cinîyan teşhîr kena eşkerayîyêke daye.

 

'Çalakî resaya serewedaritiş'

 

Eşkerayîye de ame dîyar kerdene ke bi rojan o bîyê şahidê parekerdişê cinîyan û wina ame vatene: ''Ma serran ra nata benê şahîdê ci ke parekerdişê cinîyan camêrdanê tacîzkeran eşkera kenê. Paştdayîşê cinîyan û rêxistinbîyayîşê cinîyan resayî serewedaritiş. Ma reyna dî ke bi des hezaran cinîyî name û statuyê înan se beno wa bibo maruzê tacîzî manenê. Cinîyê ke nê tacîzan îfşa kenê benê hedef. Yeno waştene ke cinîyî hîş bikerê."

 

'Ma do azadîya cinîyan biqîrê'

 

Eşkerayî de ame vatene ke do hemverê pêro binpaykerdişan de vinderê û dewam de wina ame vatene: "Ma vera tacîz û şîdetî do têkoşînê xo geşêr bikerê. Vera polîtîkayanê îqtîdarî ma do azadîya cinîyan biqîrê û edalet bipawê."

 

'Hewnê cinîyan nê ê tacîzkeran biherimîyo'

 

Tewr peyîn win aame vatene: "Pêro cinîyê ke maruzê şîdetê camêrdan benê wa baş bizanê ke ma sey cinîyanê HDPyî hetê înan de yê. Ma do vera şîdetî bêveng nêmanê û têkoşînê xo ra fek vera nêdê. Êyê ke do bêveng bimanê cinîyî nê kerdox ê. Ganî hewnê cinîyan nê ê tacîzkeran biherimîyo."