ENQERE - Sereka Devrîmcî Partî (Partîya Şorişgêr) Elîf Torun Oneren, derheqê tepişteyê ke tecrîdê serê Raberê PKKyî Abdullah Ocalan de kewtê grev de qisey kerd û va: "Wezîfeyê ma yo tarîxî yo ke ma tecrîd ra vajê ney."

 

Tepişteyê PKK'yî û PAJK'î hemverê tecrîdê serê Raberê PKKyî Abdullah Ocalan û binpaykerdişê heqan yê zîndanan 27'ê Teşrîna Peyêne de dest bi grevê vêşanîye ya bêdem û bidor kerdî. Grevo ke roja 18ine de dewam keno, hetê koma çaran ra dewr ame girewtene. Sereka Devrîmcî Partîye (DP)  Elîf Torun Oneren, dîyar kerd ke grevê vêşanîye tena eşkenê bi wedaritişê tecrîdî peynî bibê.

 

'Wazenê şarê Kurdî ten averdê'

 

Elîfe bi silamkerdişê tepişteyê ke vera tecrîdî grev de yê, dest bi qiseykerdişê xo kerd û va: "No helwest hemverê şarê Kurdî yo. Yeno waştene ke şarê Kurdî ten abêro verdene. Blokê faşît ê AKP -MHPyî, bi sebebê şert û mercê pandemî de pêvînayîşê bi avûkat û keyeyê ey dir qedexe kenê û hetêk ra zî cuyêka bêmerdimayî tepişteyan rê ferz kenê. Sebebê tecrîdê serê Rayberê PKKyî Îmralî de bi cezaya dîsîplînî ramojnenê. La goreyê ke ma çapemenî ra taqîb kenê, na ceza 2 mengan avûkatan ra ameya nimte û dimayê ke warê huqûqî de heqê îtîrazî peynî bîyo, keye rê neql kerdê. No sucê merdimîyayî yo."

 

'Tecrîdê Îmralî destpêkê tecrîdî bînan o' 

 

Elîfe dewam de dîyar kerd ke zîndanan de şert û mercî her ke şinê giran benê û va: "Înan bi merg ceza kenê. Nê kesî nêeşkenê biewnê xo ra. No tecrîd nîyo, no cînayet o. Tecrîdo ke Îmralî de serê Abdullah Ocalan ame destpêkerdene, zîndanê bînan de zî vila bi. Tecrîd her ca de esto. Bi tesrîdkerdişan her ke şino faşîzm aver şino. No xo bicaardişê AKP û MHP'ê xo vejeno teber."

 

'Paştdayîşê seba tepişteyan wezîfeyê ma yo tarîxî yo'

 

Elîfe dewam de wina va: "Paştdayîşê seba tepişteyan, wezîfeyê ma yo tarîxî yo. Wexto ke ma hemverê tecrîdî vejîyê, do faşîzm zî peyser şêro. Xoverdayîşê tepişteyan, rûmet o. Wezîfeyê her kesê ke teber de yê vera tecrîdî têkoşîn bikerê û paştdayîş bidê tepişteyan. Vera faşîzmê AKP-MHPyî ganî ma bibê vengê tepişteyan. Ez veng dana her kesî û vana seba ke tecrîdê cimetî peynî bo, ganî her kes paştdayîş bido çalakîya grevê vêşanîye."

 

'Tecrîd temamê dinya eleqedar keno'

 

Elîfe dîyar kerd ke ganî temamê Tirkîya hemverê tecrîdî vengê xo berz bikero û va: "Pêwa pêro nê caardişan, şarê Kurdî hedef  ameyê girewtene. Şîdetê tewr pîl HDP û sosyalîstan rê yeno kerdene. Sererastkerdişê zirarê ke şaran dîyo, zaf zehmet o."