AMED - Muhrîban Aslana ke lajê aye koma 3ine ya çalakîya grevê hemverê tecrîdê serê Rayberê PKKyî Abdullah Ocalan û binpaykerdişê heqan yê zîndanan kewt grev, dîyar kerd ke ganî waştişê tepişteyan bêro qebulkerdene û wina va, "Eke waştişî nêrê qebûlkerdene, ma do zî dest bi grev bikerê."

 

Zîndanê Tirkîya û vakurê Kurdistanî de hemverê tecrîdê serê Rayberê PKKyî Abdullah Ocalan û binpaykerdişê heqan yê zîndanan 27'ê Teşrîna Peyêne de grevê vêşanîye ame destpêkerdene. Grevê ke koma 4in dewr girewt, çalakwanê grevê vêşanîye yê 2018 zî tewrê çalakî bî. Tepişteyê ke warê fizîkî de bi xeylêk binpaykerdişan dir rî bi rî manenê, dîyar kenê ke heta waştişê înan bêrê qebulkerdene, ê do çalakîya xo dewam bikerê.

 

Baran Aslano ke cezaya muebetî ci rê ameya birnayene û Zîndanê Tîpê E yê Amedî de yew tepişteyê ke 2019 de tewrê grevê vêşanîye bîyo û nika tewrê grevê ke ameyo destpêkerdene bîyo yo. Dayîka Baranî, Muhrîban Aslan derheqê rewşa lajê xo de qisey kerd.

 

'Ez pey lajê xo ya û têkoşînê ci ya'

 

Muhrîbane dîyar kerd ke lajê aye 5 serrî yo zîndan de yo û wina va: "Ez nêwazena lajê mi na çalakî de bihelo û ne zî tepişteyê bînî. Ganî çareserîyêk na rewşe rê bêro vînayene. Heme kesê ke zîndanan de yê, domanê min ê. Ez wazena peynîye şîdetî bêra. Verê zî lajê mi kewtib grev û wexto ke ez şîya û mi ey dî, bi rojan ez nêameya serê hişê xo. La ez pey lajê xo û têkoşînê ey a."

 

'Eke waştişan qebul nêkerê ma do zî bikewê grev'

 

Muhrîbane tewr peyîn wina va: "Eke waştişê domananê m anêrê qebulkerdene, ma do zî bikewê grevê vêşanîye. Ma nêwazenê sey grevê verênan, zîndanan ra cenazeyî vejîyê. Ma heqê xo wazenê. Bi tepiştişê domananê ma no çareser nêbeno. Eke ê grev de bê, ez rehet nêbena. Ez nêwazena domanê ma bihelîyê. Ez dayîk a û edalet wazena."