COLEMÊRG - Necla Atak, Zîndanê Kandirayî de ya û bi rayîrê keyeyê xo mesajêk erşawit û va: "Seba çalakîya grevê vêşanîye serkewte bibo, ganî şar bibo yew û wayîrê çalakîye vejîyê."

 

Hemverê tecrîdê Rêberê PKKyî Abdullah Ocalanî 27'ê teşrîna peyêne de tepişteyê PKK'yî û PAJK'î dest bi grevê vêşanîye ya bêdem û bidor kerdî. Roja 17ine de çalakî dewam kena. 

 

Necla Ataka ke Geverê Colemêrgî ra ya û Zîndanê Girewte yê Tîpê F yê Kandirayê Kocaelî de manena. Necla 17'ê teşrîna peyêne serra 2017 de Qoserê Mêrdînî de ameye destbendkerdene û dima ra 33 serrî ceza dayî ci. Necla tewrê çalakîya vêşanîye ke bi rayberîya Hemsereka Kongreya Komela Demokratîke (KCD)  Leyla Guven ame destpêkerdene bîbî. 117 rojan çalakîya xo dewam kerdib. Necla bi rayîrê telefonî bi keyeyê xo dir qisey kerd û bale ant serê rewşa zîndanan.

 

Necla qiseykerdişê xo yê bi telefonî de wina va: "Îqtîdar derheqê weşîye merdiman de çîyêk nêkeno. Xora zîndanan de tecrîd esto û bi sebebê pandemî zî tewr zêde tecrîd yeno girankerdene. Ma nêeşkenê embazê xo bivînê û ma nêeşkenê înan dir qisey bikerê. Wexto ke ma anê ziwan zî korona kenê sebeb.

 

Wexto ke merdim tarîxê polîtîkayê dewlete ewnîyeno, merdim vîneno ke her wext hêriş tewr zêde beno xidar. Bi taybetî zî zîndanan de. Hemverê şarê Kurdî, hemverê ziwan û kulturê kurdî tewr zêde teda yenê kerdene. Hemverê rayberê ma zî tecrîd yeno girankerdene. Ganî her kes bizano ke tecrîd hemverê pêro komelî yeno kerdene. Eke komelêk wazeno boyêk bigîro ganî tecrîd werte ra wedarno.

 

Ma nê zîndanî de 4 kom bî û nika koma 3in grev de ya. Koma yewin de Çaglar û Seher estbî, koma diyîn de Laleş û koma 3in de zî Sabahate Tuncel û Leyla estê. Koma çarine zî do ewro çalakî dewr bigşra. Ez veng dana şarî ke wayîrê çalakî vejîyê. Seba serkewtişî ganî ma bibê yew."