ENQERE - Vervatoxa HDPyî Ebrû Gunay dîyar kerd ke problemî bi rayîrê muzakere bêrê çareserkerdene û wina va: "Waştişê tepişteyan waştişê ma yê. Ma do verê vengdayîşê înan de bêveng nêmanê."

 

Vervatoxa HDPyî Ebru Gunay merkezê pêroyî yê HDPyî de kombîyayîşêkê çapemenîye kerd û rojdem ercna.

 

Ebrûye dîyar kerd ke heqê cuyêka têduşt, azadî heqê bingeyîn yê merdimayî yo û va: "Îqtîdarî nê heqî bingeyîn ê merdimayî îhlal kerdo. Heqê merdiman ê unîversal çin yeno hesibnayene. Heqê însanan yeno binpaykerdene. Ma serdemêk wina de yê însanî helîkopter ra yenê eştene, sîyasetmedar, rojnameger, roşnvîr yenê tepiştene, goristanî yenê rijnayene, dayîk cenazeyan domanê xo pakêtê kargoyî de gênê. Tirkîya de hewteyê heqê merdiman binê versîya nê babetan de yeno pêşwazîkerdene.

 

3 hezar û 695 kesî ameyî tepiştene

 

Ebrûye derheqê tepiştişan de zî wina va: "Operasyonanê qirkerdişê sîyasîyî de hemserek, wekîl, hemşaredar, îdarekar û endamê ma zî tede 16 hezar û 490 kesî ameyî destbendkerdene û 3 hezar û 695 kesî ameyî tepiştene. Tepişteyan ra 93 tenî hemserek, 194 tenî hemserekê HDPyî yê qezayan, 18 tenî wekîl, 23 tenî endamê MYKyî, 21 tenî endamê Meclîsê Partîye, 800 tenan ra zêdêr zî îdarekarê ma yê. Hema zî 7 wekîl û 15 endamê ma yê MYKyî rehîn ê. Dest nîya wekîlîya 13 wekîlan ma ser, 48 şaredarîyê ma hetê qeyûman ra ameyî xespkerdene, 37 hemşaredarê ma tepişîyayî. 18 hemşaredarê ma hema zî tepişte yê û 7 hemşaredarî zî hepsê keyeyî de yê. 82 endamê ma yê meclîsê şaredarîye wezîfe ra ameyî girewtene, 119 endamê ma yê meclîsê şaredarîye ameyî destbendkerdene û 2ê înan tepişîyayî.

 

'Hîn birînê nê bajaran nêameyê dermankerdene'

 

Ebrûye va ke bajaran de ablûqa hema zî nêqedîya yê û va: "Ablûqaya 14ê Kanûne ra 5 serrî vîyartî. Şirnex, Cizîre, Silopî, Sûr, Nisêbîn, Gever, Farqîn, Kerboran û Hezex de bi mengan ablûqa dewam kerd, bi hezaran sûcî ameyî kerdene la hema zî derheqê nê sûcan de ceza nêameye akerdene."

 

'Ma do seba azdîya welatî têkoşînê xo dewam bikerê'

 

Ebrûye reaksîyon vera tepiştişê hemserekan da û va: "Embazê ma Selahattîn Demîrtaş û Fîgene Yuksekdag bi fermanê Erdoganî sey rehîn tepişîyenê. Erdogan hukmî rê fermanan dano hukm zî ano ca. Ma bi têkoşînê xo nê welatî û hukm bikerê azad."

 

'Problemî bi rayîrê muzakere do bêrê çareserkerdene'

 

Ebrûye dîyar kerd ke tecrîdê ke serê Birêz Ocalanî de ameyo kerdene, Tirkîya ver bi tarî berdo û va: "Birêz Abdullah Ocalano ke 22 serrî yo binê tecrîdê giranî de yo prosesê çareserîye de mojna ke o eşkeno haştî û aramîye bîyaro Tirkîya. Çareserîya krîzê nikayênî yê Tirkîya zî wedaritişê tecrîdî yo. Ganî meseleyî bi dîyalogan bêrê çareserkerdene. Tepişteyan seba wedaritişê tedrîdî dest pê grevî kerd. Waştişê tepişteyanê grevê vêşanîye waşrişê ma yê. Seba ke waştişê înan bêrê caardene ma do heta peynî têkoşîn bikerê. Eke şertê çareserîye nêrê afernayene Tirkîya do nêeşka krîzî ra bixelisa. Mesuldarîyê ma yê pêroyînan estê. Ma bi nê mesuldarîyan têkoşîn û xoverdayîş pîlêr kenê."

 

Ebrûye dewamê qiseykerdişê xo de bale ant serê babetê yê rojeve de yê.