ŞIRNEX - Meryeme Zeybek, dewa Heştanî yê Şirnexî de ciwîyena û kulturê rêşta dewam kena û bi hewldayîşê xo wayîrê mîrasê dadî û pîra xo vejêna.

 

Dewa Heştanî ya Şirnexî de cinîyan kulturê rêşta bi hewldayîşê xo gane verdenê. Meryem Zeybeka 75 serrî dewa Heştanî de ciwîyena, hema zî kulturê rêşta, rêsî dewam kena û wayîrê mîrasê xo vejêna.

 

Meryeme bi eslê xo dewa Heştanî ra ya. Domanîya xo ra heta 75 serrîya xo Heştanî de cuya xo dewam kerda. Seba Meryeme cuye her wext seyyewbînan bîya. Wisar de verê xo dayê zozanan û payîz zî verê xo reyna dayê dewe. Keyeyê Meryeme koçer bî û zozanan de pesdewarî kerdêne û wina debara keyeyê xo kerdêne. Dimayê ke Meryeme emrê qij de bi zor ameye zewicnayene û barê ci tewr zêde giran bi. Êdî Meryeme berpirsîyarîyê heme karî girewtib serê xo. Her serrêk derbaz bîne, seba Meryeme bîne tecrûbeyêk. La nika nêşina zozanan û karê giran nêkena. Meryeme va ke bi taybetî karê ke keye de bêrê kerdene kena.

 

Nika seba mewsîmî kar û barê cinîyan vurya yo. Cinî û bi taybetî zî cinîyê emrê pîlî bi ronayîşê tevnî dir rêşta dir eleqedar benê. Meryeme nika rêşta rêsena wina va: "Ma serê tevnî de xeylêk çî viraştêne. Ma verê tewrik viraştêne û ma genim û cewê xo kerdêne mîyanê nê tewrikan. Nika kes sey verê nê çîyan nêvirazneno."

 

Mamosteyê Meryeme her wext dadî û pîrîka aye bîyê û nika zî hewl dana ke mîrasê înan gane verda û Meryeme wina va: "Dadî û pîrîka mi, rêşta rêsnayîşî mi rê ramojnayî. Verê pêro cinî kom bîne û pîya rêşta rêsnayîe. Ma sere de peşme xo anê û pencernenê, şane kenê û dima ra zî rêsnenê. Bi nê rêsan ez pûnc û papikan viraznena."

 

Meryeme, tewr peyîn qiseykerdişê xo de va ke êdî kes wayîrê kulturê xo nêvejîno û wina qiseykerdişê xo wina qedêna: "Ma wazenê ke pêro kesî wayîrê kulturê xo vejîyê. Eke kultur vindî bibo, do komel zî vindî bibo. Ganî sere de zî ma cinî wayîrê kulturê xo vejîyê. Ez zî seba kulturê ma vindî nêbo, wayîr vejêna."