WAN - Zero Kabak 95 serrî ya û bi serran o bi rengê kesk, sûr û zerd rayberîya çalakîyan kerda. Zeroye sey bi hezaran dayîkê kurdî, vengdayîşê yewîye kerd û va: "Ez bi taybetî veng dana şarê başûrê Kurdistanî û vana ke rayîr medê şer û seba yewîye bikewê mîyanê hewldayîşî."

 

Serebûtê sîyasî yê Herêma Federal a Kurdistanî, rojeva tewr germ a. Pêkerdişê Bexda-Hewlêr ê hemverê Şengalî, operasyonê sîyasî û leşkerî yê herême endîşeyê tewr pîl yê Kurdan o. Hemverê sîyasetê ke nika yeno averberdene, dayîkî mîyanê hewldayîşî de yê. Yew zî nê dayîkan ra Zero Kabak a.

 

Zero Kabak 95 serrî ya, serrê 90‘î de seke bi hezaran kurdê bîn mecbûr mendî ke dewa Martanîsa qezaya Şaxê Wanî terk bikerê. Zero, taxa Suphanî ya qezaya Artemetê Wanî de bi ca bî. Zero hemverê koçberî, zulm, zordarî, îşkence û şîdetî de qetî wareyê têkoşînî terk nêkerd. Her çalakîyan de Zeroye bi cil û belgê xo yê kurdewarî, bi rengê kesk, sûr û zerd wareyan de rayberî kerd. Zeroya Wanij e, seke Dayîka Zero yena naskerdene. Seba ke her çalakî de ca gêna, her rey bi hêrişê polîsan dir zî rî bi rî manena. Hêriş û qedexe tu wext hemverê têkoşîn û xoverdayîşê Zeroye nêbê asteng.  Zeroye derheqê serebûtan de fikrê xo ajansê ma rê qal kerd.

 

'Hemverê zulmî têkoşîn kenê'

 

Zeroye, destpêkê qiseykerdişê xo de bale ant serê vîrardişanê xo û va: "Ez 95 serrî ya û mi heta nika zulm, zordarî, zehmetî, destbednkerdiş û tepiştiş dî. Lajê mi hema emrê qij de verê xo da ko. Dima ra ame tepiştene û cezaya muebetî girewt. Mîyanê 17 serran de xeylêk zîndanan de mend. Sey domanêk ame tepiştene la do sey kal vejîyo. Tena lajê mi ney, sey lajê mi bi hezaran domanê Kurdî nika tepişteye yê. Domanê m ahemverê zulm û îşkenceyan mîyanê têkoşînî de yê."

 

'Ganî Kurdî bibê yew' 

 

Zeroye bale ant serê cil û belgê xo û va: "Ez Kurd a, dadî û pîyê mi zî Kurd ê. Rengê kesk, sûr û zer kurdbîyayîşê mi temam kenê. Eke ez bimirî, mi bi nê rengan bipêçê. Ez ciwîyayîşê xo de xeylêk rastê zor û zehmetîyan ameya. Dewa ma ameye veşnayene, ma vêşan mendî û ma perîşan bî. Eke mîyanê Kurdan de yewîyêk bibo, do xeylêk problemî çareser bibê.”

 

'Wa tornê ma azadî bivînê'

 

Derheqê Zeroye de xeylêk dewa ameyê akerdene û wina va: "Ganî tirkî şerê Çanakkaleyî nêkerê xo vîr ra. Kurdan, Mezgir de tirkan rê ber akerd. Ganî tirkî nê çîyan xo vîr ra nêkerê. Labelê ver anê, Kurdan rê zulm kenê. Ez her roje seba aştî dua kena. Ez a bawerî de ya ke ez o azadîya lajê xo nêvînî. La ez wazena ke tornê mi azadî û edalet bivînî."

 

Zeroye tewr peyîn wina va: "Bi polîtîkayê birakiştişî tu wext yewîye bi ca nîna. Ez veng dana şarê Başûrî ke nê çî qebul nêkerê. Beno ke sib abêro sereyê înan zî."