AMED - Şaîra Fatêxan Taşli Tûnç ke bi îmkananê xo wendiş û nuştiş musa û nika edebîyat dir eleqedar bena û va: "Ez her wext mîyanê hewldayîşê musayîşê wendiş û nuştişî de bîya. Ez serkewte zî bîya. No çî seba mi zaf girîng o. Nika hacetê têkoşînê mi qelema min a."

 

Wexto ke cinî biwaza, eşkena pêro sînorê dorê xo eşkena birijna. Her çî bi waştiş û hewldayîş yeno meydan. Nê cinîyan ra yew zî şaîre Fatêxan Taşli Tûnç a. Fatêxan, serra 1967 de Amed de ameya dinya. Wexto ke 16 serrî bîye, bi zor ameya zewicnayîş. Bi domananê xo dir pîl bîye. Dimayê 20 serrîyê xo, nuştiş û wendiş bîye. Heta nika şîîr û hîkayeyî ci xeylêk keyepel, kitab û rojnameyan de ameyê weşênayene.

 

'Cuya mi bi dej û dert bî' 

 

Fatêxan, ard ziwan ke aye cuya xo de xeylê dej anta û va: "Dewa ma de wexto ke kênayî bîne 16 serre, ameyîne zewicnayîş. Ez zî emrê qij de zewicyaya. Ez xeylêk xemgîn bibîya. Bi no hawayî mi gilayê xo yê derg tera kerd. Ez hema zî nimnena. Mi ey nas nêkerdêne. Ma yewbînan ra hes nêkerdêne. No seba ma zaf zehmet bi. Ez bi şîdetî dir rî bi rî menda. Cuya mi zaf bi dej û derdan derbaz bi."

 

'Ez bi îmkanê xo nuştiş û wendiş musaya'

 

Fatêxan, bi îmkanê xo nuştiş û wendiş muasaya û wina va: "Çi heyf, ez qet nêşîya mektebe. Mi xeylêk waşt ke ez şêrî mektebe. Bi no hawayî senîn domanêk/e mektebe de nuştiş û wendiş beno/a. Ez zî bi hewildayîşêk pîl musaya. La wextê mi zaf kêm bi, domanê mi o wext qij bî. La mi zêde hewl da ke ez bimusî. Hema mi erd de çi nuştiş bidîne mi wendêne. Nika zî ez tewr zêde edebîyat dir eleqedar bena. Destpêk de mi bi ziwanê tirkî nuştêne, la dima ra bi Rojnameyê Azadîya Welatî ez nuşte musaya û wendişê bi kurdî bîya. O wext pîyê mi aboneyê rojnameyî bi û her wext ci rê ameyîne. Dima ra ez zî bîya abone û mi hewl da ke ez Azadîya Welat biwanî. Bi no hawayî mi dest bi nuştişê û wendişê bi ziwanê kurdkî zî kerd. Dima ra zî mi dest bi nuştişê şîîran kerd."

 

'Mi ti rey fek nuştişî vera da'

 

Fatêxan, qiseykerdişê xo de bale ant serê û wina va, “Demo ke mi xo musna wendiş û nuştiş kerd, keye de mabêne mi û mêrdeyê mi de şer vejîya. La hemverê mi her wext astengî bî. Yarînîye xo bi mi kerdêne, la mi zî goş nêda. Her wext hemverê mi şîdetê fizîkî kerdêne la rojêk ez hemverê ci vejîyaya. Dimayê a roje dima şîdet zî qedîya. Nika ez bi edebîyat dir eleqedar bena. Nika hacetê têkoşînê mi qelema min a.