Melîke Aydin

 

ÎZMÎR - B.D 2019-2020 de koguşê edlî yê Zîndanê Cinîyan ê Şakranî de tepişteye bî, dîyar kerd ke îşkence û muameleyê nêbaş tepişteyan rê ameyîne kerdene û va yê ke zîndan de yê nêeşkenê vengê xo bidê eşnawitiş.

 

B.D. a 2019-2020'î de koguşê edlî yê Zîndanê Cinîyan ê Şakranî de seba sucê tîryakî tepişte bî, îhlalkerdişê heqan ê ke zîndan de bî, neql kerd. B.D. a koguşê B-13, C-9, B-11, C 10 û C-9 menda de dîyar kerd ke koguşê edlî de îşkence yenê kerdene, hîn koguşan de zî tecawuz yeno kerdene, gardîyan û îdareyê zîndanî kewenê tevgerê bêhuqûqî û hemverê rûmetê merdiman. Sewbîna B. dîyar kerd ke mektubê tepişteyê ke seba Wezaretê Dade yenê nuştene, hetê  îdareyê zîndanî ra yeno wendene û yenê astengkerdene.

 

'Zîndan de îşkence ame kerdene'

 

B. dîyar kerd ke tedawîkerdiş zîndan de zaf zor o û va: "Gardîyanî heqaretê giran kenê. Koguşê lezbîyenan de bi hacetan tecawuzê cinîyêke digane ame kerdene û domanê ci ver şi. Ê kesan erşawitî surgun. Cinîyêke bi nameyê Rabia Ozdemir estbî. Problemê aye yê weşîye estbi. Dermanê giran xebitnayîne. Wexto ke derman xebitnayîne, rew bîne vêşan. Aye zî nan waşto. Tewr peyîn jendermeyê robokop bi kaskan aye kerdî banyo. Seba ke rêçe engiştan nêvejîyê, şil kerdê. Serê rîyê aye de rêçê memûr aseyîne. 2019 de koguşê C-10 de bî. O wext derheqê îdareyê zîndanî de muracatê sucî nêame kerdene. Çunke tepişteyan rê tehdîd ameyîne kerdene. Ez hewn ra wişta û mi waşt ke şêrî war. Labelê memûran nêverda. Bi qêrîyayîşî a cinî zîndan leqa."

 

'Bi hawayêk kêfî cezaya hucre dayîne'

 

B. dîyar kerd ke humartişê serê lingan yeno kerdene û wina va: "Wexto ke problemê to bibo, to çîyêk zî nêkerdo zî derheqê to de zabitname gênê. Tewr peyîn zî to erşawenê koguşê lezbîyenan. 4 mengî seba koguşê mi bivurnê, mi mudure ra lawî kerd. Uca de zî lezbîyen estbî. Seba ke her wext şer kenê, psîkolojîyê merdimî xira beno."

 

Bêheqî yê keda erjan ê zîndanan

 

B. bale ant serê bêheqî keda ya erjan ê zîndanna û wina va: "Menge de seba 120 tewr zêde tepişteyî 170 TL'yê binê şertê xidar de yenê xebitnayene. Kesê ke keyeyê înan çin bê, cezaya înan ê dîsîplînî çin bi, yenê xebitnayene. Ez rojêk şîya la mi nêeşka bikera."

 

'Di mengî kalorîferan nêxebitnayî'

 

B. eynî wextî de bale ant serê şertê pakitî yê zîndanî û wina va: "Zîndanî pak nêbî. Koguşê C-9'ê de espijî kewtî sereyê cinîyêk. Kesê koguşan de yê bi îradeyê xo pakitî kenê. Sibat de kolorîfer nêfînayî ta. Ma binê di betanîyan de zî germ nêbîne. Seba ke ma rakewê, ma şîne qursan."

 

'Gardîyanan vatêne bimirê'

 

B. dîyar kerd ke wexto ke aye xo bi hacetê tûj birîndar kerda, gerdîyanan aye rê heqaret kerdê û wina va: "Gardîyanan ma ra vatêne bimirê. Linga mi mîyanê gonî de masa bî. Yê ke ambulans de bî înan ra heridyayî. Ganî vengê nê cinîyan bêro eşnawitene."