COLEMÊRG - Welatîyê Geverijî reaksîyonê xo vera VEDAŞî ke verê polîsan eşt serê taxa înan de û 4 kesî birîndar kerdî, ramojnayî. Cinîyê nê taxan de nêşnenê ro vatî, "Polîsî erzenê serê taxa ma û serebûtî vejenê û danê doman û ciwananê ma ro."

 

Qezaya Geverî ya Colemêrgî taxa Ormanî de 2'yê Kanûne de bi îdayê ke welatijê taxe ceryan qaçax xebitnayî, Sazgehê Vilakerdişê Ceryanî (VEDAŞ) pêwa polîsan eştibî serê taxe, saetê dîrekê ceryanî vetibî, ceryan serê taxe de visnabî û cezaya pere welatijan rê nuştibî. Welatijî zî seba ke pereyêk zêde faturayê înan de ame nuştene, reaksîyonê VEDAŞî dayî. Polîsan hêrişê welatijê ke reaksîyon ramojnayî kerd. Netîceyê hêrişî de 4 welatijî ameyî birîndarkerdene. Welatijî ke polîsan hêrişê înan kerd, dîyar kerdî ke her wext erzenê serê taxe û her ke yenê zî cezaya pere înan rê nusnenê.

 

'Hewce çin o ke VEDAŞ polîsan xo dir bîyaro'

 

Taxe ra Pakîze Işik, dîyar kerd ke VEDAŞ tena reyke ney, her wext wina keno û va: "VEDAŞ  her ke yeno taxe 5,6 hezar TL ceza birneno. Hewce nêkeno ke polîsan dir bêrê, wa bêrê verê ma, ma do înan rê hetkar bibê. Wa kesê ke ceryan qaçax xebitnenê, tespît bikerê û ceza înan rê bibirnê. Ê dizdê, dizdîyê xo zî pereyê feqîran ra gênê û wazenê xo wina binimnê. Doman û ciwanê ma nê nêheqî qebul nêkenê û nêwazenê bêrê taxe. Polîsan bi bombayê gazî hêrişî ma kerdî. Seba ke gaz eştî, cêrîya mi nêweşîya qelbî ya û rewşa aye giran bî. Ma mexdûr ê. Nika keyeyê ke ma ci de yê, ê ma nîyo û wirzenê ceza bibirnê. Ma nêeşkenê na ceza bidê, seba ma xeylêk giran o. Kesêk ma ke bixebityo çin o û mêrdeyê mi 5 rey qelbê xo ra anjîyo bîyo."

 

'Ma aciz kenê û serebûtî vejenê'

 

Semra Işik zî va ke bi wesayîtê zirxî yenê taxe, bi gazê îsotî hêrişê ma kenê û va: "Tu çekê ma çin o, çira polîs bi çek hêrişê ma kenê. Wa biewnê eke ceryan qaçax ameyo xebitnayene, wa abonetîyê ma îptal bikerê. La wa bi çek nêrê taxe ma aciz nêkerê û serebûtî nêvejê. Verê her xebatkarêk VEDAŞî de 10 polîsî est. Domanê qijî seba boy agazî bênefes manenê."

 

'Seke roja qîyametî bî' 

 

Esmer Aşkana ke bi guleyê polîsan ê plastîk birîndar bî zî wina va: "Wexto ke VEDAŞ ame taxe ma, ma pêro vejîyayî teber. Seba ke mîyanê înan û domananê ma de serebût vejîya, ma şî la ma çî dî, tena panzerêk ney 20 panzer polîs kewtibî taxe. Tena çîyêk mi dî, polîsan hêrişê ma kerd.  Bi gazê îsotî û guleyê plastîk hêrişê ma kerdî. Seke roj aqîyametî bi. Guleyê plastîk gina linga mi ro û vistewrey mi zî milê ci mîyanê gonî de mendib. Ma nêzanê bi çi birîndar kerdibî. Seke roja qîyametî bî. Ez bi xo nêweşa astimî ya. Di ciwanan mi erd ra wirzna. Wa nê zulmî ma rê nêkerê. Ma nê zulmî qebul nêkenê."