WAN - Cinîyê ke Wan de ciwîyenê, hemver her tewir krîzî, têkoşînê xo yê ciwîyayîşî gane verdenê. Cinîyan mîyanê krîzê ekonomî de seba debara xo bikerê, keyeyê tenûre akerdî û tewrê wareyê berardişî bî.

 

Bi krîzê sîyasî dir krîzê ekonomî zî kûr beno. Bi pandemî dir zî tewr zêde welatî kewtî mîyanê tengî. Bi hezaran kesî Tirkîya de kargeyê xo padayî. Bi milyonan kes, kar ra ame dûrvistene. No çî tewr zêde serê cinîyan de bi tesîr bi. Cinî nika her ware de hemverê krîzê ekonomî mîyanê têkoşînî de yê. La cinî pêwa her tewir zehmetî, têkoşînê xo yê ciwîyayîşî her wext ganî verdenê.

 

Cadeyê Orhan Doganî pey Şaredarîya Gird ya Wanî ya qezaya Rayîrê Armûşî bi nameyê, “Keyeyê Tenûre a Destê Cinîyan” hetê 4 cinîyan ra ame akerdene. 4 cinîyê ke hem cîran û hem zî merdimê yewbînan ê resayî yewbînan û dest bi karêk winasî kerdî. Cinîyan karê ke her roje keye de kerdêne, nika zî seba debara keyeyê xo kar kenê û pere qezenc kenê.

 

'Bi krîzî dir cinî tewr zêde mexdûr benê'

 

Remzîye destpêk de bal eant serê krîzî û va: "Bi vîrusî dir xeylêk kesî bêkar mendî. Pêro domanê mi bêkar mendî. Seba ma problemê ekonomî dest pêkerd. Ma seba nê cîranan dir waşt ke keyeyê tenûre abikerê. Krîzê ekonomî dir cinî tewr zêde mexdûr bî. Seba camêrdan karê cinîyan girîng nîyo. Tena bi di poşetan yenê keye, hende."

 

'Ma pê pewtişê nanî debara xo kenê'

 

Remzîye dewam de wina qal kerd: "Cinîyê derûdorê mi hem cîranê min ê û hem zî merdimê min ê. Mîyanê sohbetanê ma de no qerar ame girewtene û ma keyeyê tenûre akerd. Xora keye de ma her wext nan pewjenê. Seb ama no sey kayî yo. Bi 20 serrî yo ez nan pewjena. Karo ke ez her roje kena, ez nika debara xo kena. No seba mi zaf weş o."

 

'Her roje muşterîyê ma zêde benê'

 

Remzîye va ke bi hewteyêk keyeyê tenûre akerde yo û va: "Ma saete 05.00 aya bena û her roje bidor ma mîr kenê. Dima ra zî ma 4 cinî dest bi pewtiş kenê. Kesê ke nan gênê, nanê ma ecibnenê. Her roje muşterîyê ma zêde benê."

 

'Ma hemverê fehmê camêrdan vejênê'

 

Remzîye tewr peyîn wina va: "Xeylêk cinî wexto ke yenê verê ma, 'ma zî wazenê karêk wina bikerê.' Ma pêro cinîyan ra vanê, eke şima bikewê hewldayîş, ma eşkenê hetkarî bidê şima. Ma bi hewldayîşê xo hemverê fehmê camêrdan vejênê. Cinî eşkenê serê linganê xo de vinderê."