WAN - Dîlane Olgun prodayîşê Qersî de dinyaya xo bedilnaye. Keyeyê Dîlane seba cenazeya xo bigîrê, 3 mengî verê cû testê DNAyî dabî. Cenazeya ke goristanê bêkesan ê Qersî de ameye definkerdene, dayîka Dîlane, Salîha Olgun reaksîyon ramojna û va: "Domanê ma bêkes nîyê. Ma do pey domananê xo de bê û ma do cenazeyanê xo bigîrê."

 

28’ê tebaxe de qezaya Qaqizmanê Qersî de pêrodayîşêk de Dîlan Olguna endama HPGyije dinyaya xo bedilnaye. Keyeyê Dîlane 29’ê tebaxe de seba cenaze bigîrê şî Qers. Seba cenazeye testê DNAyî dayî. La 3 mengî derbaz bi zî tu zanayîş nêame dayene. Dîlan Olgun goristanê bêkesan ê Qersî de ameye definkerdene. Dayîka Dîlan Olgun, Salîha Olgun derheqê babete de ajansê ma rê qal kerd.

 

Dayîka Dîlane Olgun, Salîha Olgun dîyar kerd ke 29’ê tebaxe de seba teşhîsî şîyê Qers û va: "Mi derheqê kênaya xo de zanayîş çapemenî ra eşnawit û dimayê ke ma eşnawit, ma verê xo da qers. Tîya zî vatî, heta ke şima testê DNAyî nêkerê, m anêverdenê şima cenaze teşhîs bikerê. Ma leşkeran dir şî Morgê Nêweşxaneyê Dewlete ya Qersî. Nîmeyê bedenê kênaya mi veşa bi û cenaze sîya bibî. Tena verdayî ma biewnê çok û linganê aye ra. Mi engişta kênaya xo ra nas kerd. Seba DNAyî zî m agonî da. Seba gonî dayîş zî 3 rey ma berdî nêwaşxane."

 

'Cenazeyê ma goristanê bêkesan de yenê definkerdene'

 

Salîha, dîyar kerd ke 3 mengî yo tu zanayîş nêgirewtê û wina va: "Kênaya mi nika goristanê bêkesan de ameya definkerdene.  Ma ra vatî, ma do 15 rojan yan zî 2 mengan de cewabêk bidê, la heta nika 3 mengî derbaz bi la tu zanayîş çin o. Domanê ma dinyaya xo bedilnenê la dewlete cenazeyê domananê ma nêdanê ma û cenazeyê domananê ma goristanê bêkesan de defin kenê. Ma nê çî qebul nêkenê."

 

'Se beno wa bibo ma do cenazeyanê xo bigîrê'

 

Salîha tewr peyîn wina va: "Wexto ke cenaze kewenê destê leşkerê tirkî, îşkence bi cenazeyan kenê. Bi nê metodî wazenê ke zerrîya dayîkê gerîla biveşnê. Tena îşkence cenazeyê domananê kurdî kenê. Ma her roje nê îşkenceyan vînenê. Çekê kîmyewî xebitnenê. Wexto şerêk yeno meydan, her kes cenazeyanê xo geyreno la dewlete wina nêkena. Dimaye ke kişena, sere tera kena. Bes o! ma ra çi wazena? Erdogan kurdan ra çi wazeno? Ma têkoşînê xo yê girewtişê cenazeyan dewam bikerê. Domanê ma bêwayîr nîyê. Çi beno wa bibo, ma cenazeyê domananê xo wazenê."