MÊRDÎN - Ame zanayene ke Aktîvîsta TJAyî Rojbîn Çetîn a ke Zîndanê Girewteyê yê Tîpê E yê Mêrdînî de yena tepiştene û nêweşîya kanserî ya rehîmî ya, nîna tedawîkerdene. Keyeyê Rojbîne ya ke lazimîyê xo yê rojane bi zehmetî bi ca ana, vengdayîşê hîsgêrî kerd.

 

Polîsan 26ê Hezîrane de eşt serê keyeyê Endamê Heyetê Îdarekarê Herêmî yê Demokratîk û aktivîsta Tevgerê Cinîyê Azadî (TJA) Sevîl Rojbîn Çetîn e û 3 saetî bi kutikan îşkence pê kerdibî. Dimayê destbendkerdişî 12 rojî Rojbîne ameye tepiştene û berdî Zîndanê Girewte yê Tîpê E yê Mêrdînî. Rojbîna ke temmuze ra heta nika tepişte ya û nêweşa kanserê rehîmî ya, zîndan de binê şertê xidarî de cuya xo dewam kena.

 

Nêeşkena lazimîyê xo yê rojane bi ca bîyara!

 

Ame zanayene ke Rojbîna ke zîndan de nêeşkena îlacanê xo bigîro, seba tedawî nêbenê nêweşxane. Goreyê zanayîşê tepişteyêke bi Rojbîne dir eynî koguşe de mendêne û rojê vîyarte de tehlîye bî, werdê cîya seba Rojbîna ke nêweşîya xo ra nêeşkena her werd biwera, nînê dayene. Ame zanayîş ke nêweşîya Rojbîne zîndan de hîn zêde beno û Rojbîne nêeşkena lazimîyê xo yê rojane bi ca bîyara. Sewbîna îdarekarê zîndanî Rojbîne nêbeno nêweşxane.

 

Hûmartene ya teberî her roje yena ferzkerdene

 

Ame zanayene Rojbîna ke binê şertê zorî de cuya xo dewam kena, bi tepişteyê ke koguşî de yê her roje hewşe de humartene yena ferzkerdene. Sewbîna goreyê zanayîşê ke avûkatan ra ameyî girewtene, tepişteyê ke humartişê teberî qebul nêkenê, her roje zabitname yeno girewtene.

 

Vengdayîşê hîsgêrî

 

Keyeyê Rojbîne ke ma derheqê babete de pêvînayîş kerd, dîyar kerdî ke ê wazenê Rojbîna ke problemê aye weşîye estê, lezabez serbest bêra veradayene. Keyeyî a babete de raya pêroyî rê vengdayîşê hîsgêrî kerd.