COLEMÊRG - Bi pandemî dir esnafî tewr zêde kewtî krîzê ekonomî, esnafê cinî yê Geverê Colemêrgî zî bi eynî babete gerrekerdoxê. Cinîyan dîyar kerd ke nêeşkenê debara keyeyê xo bikerê, kîraya xo bidê û vatî: "Seba krîzî em nêeşkenê kredî dewlete ra bigîrê çunke êdî hêzê ma çin o ma deyn bidê."

 

Prosesê pandemî de tewr zêde esnafî mexdûr bî. Esnafî hemverê krîzê ekonomî mîyanê têkoşînî de yê. Esnafê qezaya Geverê Colemêrgî reaksîyon hemverê polîtîkayê ekonomî dayî. Esnafê bi nameyê Serap Aydin û Cahîde Onver ajansê ma rê qalê rewşa xo kerdî.

 

'Êdî esnafî nêeşkenê kîrayê xo bidê' 

 

Cahîde, dîyar kerd ke seba vîrusê korona Tirkîya de krîzê ekonomî vejîyayo tewr cor û va: "Vernîya koronayî de rewşa ma baş bî û dimayê pandemî zî rewşa ma xirab bî. Ez dayîka 2 domanana û debara keyeyê xo kena. Her roja ke derbaz beno rewşa ma xirab bena. Ma nêeşkenê debara keyeyê xo bikerê. Tena Gever de ney her cayê Tirkîya de eynî problemî estê. Êdî esnafî neêşkenê kîraya xo bidê."

 

'Rewşa esnafê Geverî baş nîya'

 

Cahîde qiseykerdişê xo de bale ant serê polîtîkayê ekonomî yê dewlete û wina va: "Dewlete hîn paştdayîş dana labelê paştdayîş de ma problemî ciwîyenê. Wexto ke ez domananê xo erşawena mekteb, ez probleman ciwîyena, ez nêzana ez o se bikerî, ez nêzana. Rewşa esnafê Geverî baş nîya. Ma nêeşkenê kîraya xo bidê, nêeşkenê debara keyeyê xo bikerê û ganî problemî bêrê çareserkerdene."

 

'Hem krîz û hem zî pandemî tesîrêk negatîf serê ma de kerd'

 

Serape zî Gever de esnaftî kena wina va: "Vernîya pandemî de reyna zî rewşa ma baş bî. La nika ma nêeşkenê kîrayê xo bidê. Vernîya pandemî de 4 kesî verê mi de xebityayîne, la nika ez tena xebityena. Hem krîz û hem zî pandemî tesîrêk negatîf serê ma de keno. Ma nêeşkenê çîyêk bikerê. Ma pêro esnafê Geverî eynî problemî ciwîyenê."

 

'Dewlete heta nika seba ma tu hetkarîyêk nêkerd'

 

Serape tewr peyîn wina va: "Kîrayê keyeyî û dikanî ez nêeşkena bidî. Ma do se bikerê ez nêzana. Dewleta heta nika seba ma tu hetkarîyêk nêkerd. Wexto ke hetkarî dana zî ma nêeşkenê dima ra deynê xo bidê dewlete. Seba ke nika krîzêk kûr esto û gama ke ma kredî bigîrê ma do senîn dima ra bidê."