Medya Uren

 

MÊRDÎN - Vesîle Yuksel serrêk û 10 mengî bi di domanê xo dir zîndan de mende. Vesîle, dîyar kerd ke zîndanan de domanî hetê psîkolojî de zirarêk pîl vînenê û va: “Zîndanan de bi seyan domanî estê û mîyanê zehmetîyan de ciwîyenê, heqê domanan yenê îhlalkerdene. Ganî na babete biba rojeva pêroyî.”

 

Tirkîya de hûmara domanê ke dayîkanê xo dir zîndan de manenê resaya 780yî. Zîndanan de rewşa domanan tehluke de ya la prosesê şewbê koronoyî de rewşe tewr zêde bîya tehluke. Vesîle Yuksel yew nê dayîkan ra ya ke di domanê aye emrê înan yewe 3 û a bîne zî 5 serrî ya, bi qasê serrêke û 10 mengî yo tepişte menda ya. Vesîle qalê şert û mercê cuya yê zîndanî kena û vana ke wa cayê domanan zîndan nêbo.

 

Vesîle Yuksel bi sebebê parekerdişê medyaya komelî sibatê 2017 de ameye tepiştene. Roniştiş de seba persê, “PKK rêxistinêk terorî yo yan ney?” Vana ney, serrêk û 10 mengî cezaya zîndanî gêna. Dimayê ke ceza ameye tesdîqkerdene bi kênaya xo ya 3 serrî Arîn Mîrkan û kênaya xo ya 5 serrî Avesta erşawenê zîndan. Vesîle serra vîyarte menga temmuze de amebî veradayene. Vesîle qalê pêrosesê zîndanî kena û vana ke hema zî tesîrê zîndanî serê domananê mi de esto.

 

‘Seba domanan awe zî nêdayîne’ 

 

 Vesîle sere de bale ant serê tesîrê zîndanî serê domanan û wina va: “Demê verên ê destbendkerdişî de nêverdayî domanê mi nêzdîyê mi bibê. Dimayê ke avûkatî kewtê mabêne, destûr dayî ke ez domananê xo bivîna. Wextê ke ez ameya tepiştene bi taybetî kênaya mi Arîne rewşa ke ma ci de bî qebul nêkerdêne. Şewan qet nêeşkayîne rako. Ê wextî seba ma xeylêk zehmet derbaz bî. Domanan her wext verê berî de qêrînayîş kerdêne û vatêne ma vejê. No seba mi zaf zehmet bi. Xêrcê domananê mi hîn domanê bînî zî estbî. Hemine sey yewbînan werd nêwerdêne. Werd goreyê domanan nêdayîne. Ne şit ne zî çîyêk bîn. Dima ra ma Erzîncan ra surgunê zîndanê Baybûrtî kerdî. Ê wextan de seba ke ma awe bişimnê şûşeyê awe nêdayîne. Ma bi destê xo awe dayîne domanan.”

 

‘Bibê vengê zîndanan’

 

Vesîle va zîndan domananê mi rê sey qabus bi û wina va: “Hetê psîkolojî de înan zirarêk pîl dî. Nika zîndanan de bi seyan domanî ciwîyenê û bêşik pêro zî tewr zêde zehmetî ancenê. Nika zîndanan de îhlalkerdişê heqan zêde yo. Ganî her roje na babete biba rojeve. Nika domanê ke psîkolojîyê înan xira bîyo, tê ke problemê înan weşîye estê, estê. Bi pandemî dir cuya înan tehluke de ya. Umîd kena ke her kes vengê înan rê bibo veng.”