Rojda Aydin

 

ŞIRNEX - Dengbêje Wetha Kolança ke bi deyîran şewatê zerrîya xo ana ziwan, dîyar kerd ke kulturê dengbêjî ver bi çinbîyayîşî şono û va: “Ma nêwazenê kulturê ma bêro çinkerdiş. Ganî pêro kesî wayîrê kulturê xo vejîyê.”

 

Yew sembolê ciwîyayîş û kulturê kurdan dengbêjî yo. Gama ke merdim vano dengbêjî dej, elem, weşî û şayî yenê vîrê merdimî. Seba ke her dengbêjêk/e dej û weşîya bi kilamê xo ano/a ziwan. Qezaya Cizîrî Şirnexî cinîya bi nameyê Wetha Kolanç (50) zî bi kilamanê şewata zerrîya xo ana ziwan. Wetha ke Cizîr ra ya, emrê xo yê domanî de ameya zewicnayîş û maya hîrê domanan a. Wetha dimayê zewicyaya, mêrdeyê aye hewî arda ser û a zî fek ci ra vera daya. Wetha, 10 serrî yo ke bi hîrê domananê xo rê têkoşînê cuye dana. Wetha, hemverê pêro zor û zehmetîyê cuye vinderta û domanê xo pîl kerda.

 

Wetha ke dengbêjî kena dejê xo bi kilaman ana ziwan û hetêk ra zî kulturê dengbêjî dana cuyayîş. Wetha va ke emrê domanî de kilaman vatêne, mîyanê şarî de sey “Eyşe Şan” ameya binamekerdene û wina va: “Ez dengbêjî dayîka xo ra musaya. Gama ke dayîk, kal û pîrê mi kilaman vatêne, mi înan ra goşdarî kerdêne. Mi goş dayêne înan û ez dengbêjî musaya. Ma reyan bi cinîyê dengbêjan dir yenê têhet. Ez gama ke domane bîya mi dest bi dengbêjî kerd. Her kes vengê mi şibnayîne Ayşe Şane. Kilamê ke kal û pîrê ma ra mendê ez vana.”

 

‘Eke no kultur vinî bibo şar zî vinî beno’

 

Wetha, dîyar kerd ke veyvan de kilaman vatê û va: “Gama ke ma şîne veyve, çol û seyranan ma kilaman vatêne. Sewbîna reyan ma bi cimiet dir zî ameyîne têhet û ma dengbêjîye kerdêne. La nika veyvan de her kes sazbendan ano û mîyanê cimietî de êdî bi hawayêk xozayî kilamî nînê vatene. Kulturê ma yê verên ê dengbêjî çin beno. Dengbêjî parçeyêk adetê ma yo. Ganî her kes wayîr vejîyo. Eke no kultur vinî bibo şar zî vinî beno.”

 

‘Ez nêwazena kulturê ma vinî bibo’

 

Wetha, tewr peyîn wina qedêna: “Estanika her kilamêk rastîyê cuye yo. Gama ke ma nê kilaman goşdarî kenê, hêsrî çimanê ma ra yenê warî. Êdî sey verê weşî nêmendo. Kilamê ke ez vana; serê xoverdayîş, dej, weşî û şayî yê. La ma êdî veyvan de kilaman nêvanê. Seba ke bi rayîrê teknolojî û bi ardişê sazbendan dawetî yenê kerdene. Ez bi xo mîyanê cuye de kilaman vana. Ma nêwazenê ke kulturê ma vinî bibo. Wa pêro kes wayîrê kulturê dengbêjî vejîyo.”