WAN - Fatma Îtah seke bi hezaran dayîkê kurdî seba serebûtê sîyasî yê Herêma Federal a Kurdistanî mîyanê endîşeyan de yê. Fatma, dîyar kerd ke ganî her kes hemverê şerî mîyanê tevgerî de bê û rayîr vernîya şerî de bigîrê.

 

Serebûtî sîyasî yê Herêma Federal a Kurdistanî her ke şino kûr beno. Helwest û nêzdîbîyayîşê PDKyî hetê raya pêroyî yê kurdî ra rastê reaksîyonan yenê. Xeylêk sazgeh û kesayetê kurdî seba yewîya vengdayîş kenê la heta ewro hetê PDKyî ra tu cewabêk nêameyo dayene. Keyeyê ke domanê înan mîyanê Tevgerê Azadîye de ca gênê yan zî dinyaya xo bedilnayî veng dayî Serekê Pêroyî yê PDKyî Mesud Barzanî ke rayîr vernîya şerî de bigîro. Fatma Îtah domanê xo têkoşîn de vinî kerd veng da Barzanî. 

 

Serrê 90 de dewa Fatma Îtah Govêhedlan a Zozanê Merzana Şaxa Wanî ameye vengkerdene. O demî de her wext leşkeran eştêne serê keyeyî Fatma. Dewijî her wext hetê leşkeran ra ameyîne tehdîtkerdene. Seba teda û zordarî mecbûr mendî ke dewa xo veng bikerê. Heme mulkê xo dewe de verdayî. Fatma va ke o wext xeylê kesî bi îşkence dir rî bi rî mendî û va: “Dimayê ke qorîcî dewe de ameyî bicakerdene, tewr zêde rewşa dewe nêweş bî.”

 

Fatma, dîyar kerd ke ferdê keyeyî verê xo dayê Herêma Federal a Kurdistanî û wina va: “Seba şerê bîyaye, xeylê probleman dir rî bi rî mendê. Pîlê ma demê vîyarte de seba şerî verê xo dabî Wan. Pîlê ma her wext qalê weşîkîya herra xo kerdêne. Nika zî seba rewşa tîya xeylêk merdimê ma verê xo dayî Başûr.” 

 

Fatma dewam de wina va: “Ez veng dana Mesud Barzanî ke wa hemverê şerî vejîyo. Rayberî îşxalkerdişê Şengalî rê keno. Rojawan rê keno. Mesûd Barzanî serekê parçeyêk Kurdistanî yo û ganî wina zî wezîfeyê xo bi ca bîyaro. Xeylê merdimê ma Başûr de ciwîyenê û tîya mulkê ma esto. Nêzdîbîyayîşêk bi no reng nêro qebûlkerdene.”

 

Fatma tewr peyîn wina va: “Lajê mi têkoşînê Tevgerê Azadî de dinyaya xo bedilna. Ma tena heqê xo yê ciwîyayîşî wazenê. Şer tena seba kurdan ney seba pêro şaran tehluke yo. Coka her kes hemverê şerî vejîyo. Ma nêwazenê domanê ma bêrê kiştene.”