SÊRT - Hemşaredara Sêrtî Bêrîvan Helen Işik wezîfeyê xo ra ameye dûrvistene û 6 mengî yo keye de ameya hepskerdene. Bêrîvane dîyar kerd ke sîstemê hemserekî bîyo tersê sîstemê bîyaye û va: “Ma qetî fek sîstemê hemserekî ra vera nêdanê û ma do têkoşînê xo dewam bikerê.”

 

Hemşaredara Sêrtî Bêrîvan Helen Işik, bi qerarê Wezareta Karê Zereyîn kar ra ameye dûrvistene û vera aye qeyûm ame tayînkerdene. Dimayê ke qeyûm ame tayînkerdene 15’ê gulane de ameye destbendkerdene û bi cezaya hepsê keyeyî ameye veradayene. 6 mengî yo keye de ameya hepskerdene. Pêwa 6 mengî yo keye de ya, derheqê aye de tu îdîaname nêame amadekerdene. Derheqê babete de Bêrîvane ajansê ma rê qisey kerd.

 

Bêrîvane destpêkê qiseykerdişê xo de bale ante serê helwestê îqtîdarî û va: “Îdiayê verê çi bî nika zî eynî îdia estê. Şexsê ma de sîstemê hemserekîye yena muhakemekerdene. Îdiayê ke yenê kerdene polîtîk ê. Çîyêk bibo suc çin o. Şaredarî de her çî goreyê qanûnî ma kerd. Çîyê ke hemverê ma kenê metodêk şîdetî yo. Bi cezaya hepsê keyeyî mi şarî ra visnayî.”

 

Bêrîvane dewam de wina va: “Şar sîstemê hemserekîye ecibna û coka weçînayîş de vindertişê xo ramojna. Îqtîdar hurmet îradeyê şarî rê nêramojna. Labelê dimayê ke qeyûm ame tayînkerdene şar wayîrê şaredariya xo vejîya. Çîyo ke ma rê girîng bi îdarekarîyê bi şarî dir bi.”

 

Bêrîvane tewr peyîn va ke hemserekî sîstemê cinîyan o û va: “Hemverê sîstemê cinî hêrişêk esto. La ganî nêro xovîrrakerdene ma pratîzekerdişê sîstemê hemserekîye de bi qerar ê. Na xeta ma ya sûr a. No sîstem seba vurnayîş û vurnayîşê komelî sîstemêk esas o. Sîstemo ke cinî bi hêz keno, ma fek ci ra vera nêdanê.”