AMED -  Hunermende Pelda Aytaş a ke bi berardişê xo yê bi nameyê, "Anitnakiş" nameyê cinîyê ke ameyê qetilkerdene nexş kerdê wina va: “Cinîyê ke seba şîdetê camêrdan yenê kiştene, bi statîskan yenê ramojnayene. O zî beno sebebê xovîrrakerdişê name û hîkayeyê cinîyê ke ameyê qetilkerdene. Na xebate seba vîrardişê ke hetê camêrdan ra ameyê kiştene nêrê xovîrrakerdene.”

 

Şîdet, taciz, tecawuz û kiştişê cinîyan her roja ke şino hîna zêde beno. Cinîyan zî hemverê kerdişanê xo birêxistin kenê û têkoşînê xo girs kenê. Cinîyan bi her hawayî hewl danê ke kerdişê hemverê cinîyan bîyarê rojeve û bidê munaqeşekerdene. Bi hemkarîya, ‘Karê Hempar’ û atolyeya A4 8’ê Teşrîna peyêne de pêşengehêk ame akerdene. Pêşengeh de berardişê tewir bi tewir yenê pêşkeşkerdene û pêşangeh do heta 29’ê teşrîna peyêne akerde bo. Pêşengeyêhî de berardişê hunermende Pelda Aytaş a bi nameyê "Anitnakiş" zî esto. Pelda, nameyê cinîyê ke ameyê qetilkerdene nexş kerda û nexş sey hacetêk xoverdayîşî xebitnaya.

 

Pelda destpêkê qiseykerdişê xo de bale ant serê xebata xo û dîyar kerd ke aye platformê dîjîtal yê ke cinî ameyê kiştene tesîr bîya û va: “Çi heyf, êdî kiştişê cinîyan bi dayeyê statîskan yenê ramojnayene. O zî beno sebebê xovîrrakerdişê name û hîkayeyê înan. La pêro cinîyê ke ameyê qetilkerdene hîkaye, umîd û waştişê înan ciwîyayîşî zî estbi. Coka mi waşt xebata xo de cinîyê ke ameyê kiştene nêdî xovîrrakerdene. Mi 7ê sibate ra dest bi kar kerd.”

 

‘Bi nexş cewabê xo yê xoverdayîşî dayî’

 

Pelda dîyar kerd ke nasnameyê cinî hedef yeno girewtene û wina va: "Cigêrayîşî mi de, xeylê cinî hetê mêrdeyê xo ra ameyê kiştene. No zî raştî de mi dejna. Umîd û xeyal û waîtişê ê cinîyan estbi û xeyal û cuya înan destê înan ra ame girewtene. Coka mi tewirê nexşî weçîna. Seba ke nexş bi umîd û waştişê pîlan yeno amadekerdene. Ser de keda cinîyan esta û eynî wextî de seba cinîyan nimûneyêk xoverdayîşî yo. Wareyê hunerî de ke kede û xebata cinîyan çin yena hesibnayene, cinîyan bi nexş cewabê xo yê xoverdayîşî dayê.”

 

‘Dimayê pêşengehî ez o xebata xo dewam bikera’

 

Pelda va, wa kiştişê cinîyan meşrû nêro vînayene û vatişê xo wina qedêna: “Ez o dimayê pêşengehî zî xebata xo dewam bikera. Reaksîyon û têkoşînê min ê hemverê kiştişê cinîyan no yo. Seba ke kiştoxî nînê cezakerdene kiştişê cinîyan zêde beno. Medyaya komelî kiştişê cinîyan kena seke hacetê magazînî. Sewbîna ganî reaksîyon hemverê kiştişê cinîyan bi rayîrê medyaya konelî de bi sînor nêmano.”