MÊRDÎN - Semedê krîzê ekonomî û vîrusê ke vernîya ci nîno girewtene, êdî merdimî nêeşkenê nanêk zî berê keyeyê xo. Rotox û girewtoxî qisey kenê û agêrenê keyeyê xo.

 

Tirkîya ke krîzê ekonomî her ke şino kûr beno, korona zî roj bi roje tesîrê xo zêde kena. Semedê krîzê ekonomî sebze û fêkî ke yenê hal êdî hal ra nêeşkenê vejê û cayê xo de manenê. Esnafê halî ke şan de dezgehê xo gênê ke bêrê keye, dîyar kerdî ke goreyê serrê vîyarte rotiş û girewtiş zaf kêm bîyo û kesê ke yenê bazar dest veng agêrenê keyeyê xo.

 

'Ma siba ra heta şan de ronişnenê'

 

Evîn Orala ke Mêrdîn de her roj bazarêk de desgehê xo akena û cilê domanan roşena, dîyar kerd ke êdî nêeşkenê şîyayeyê xo rojane vejê û wina va: "Verê tîşortêk ma bi 20 TL rotêne, nika tewr tay 30 TL yo. Coka ma êdî nêeşkenê çîyêk bigîrê. Ma serê siba heta şan de rotiş bikerê verê dezgehê xo roşê. Kesê ke feqîr bî hîna bî feqîr. Seba krîzî kesê ke şan de yenê bazar ra fêkî û sebzeyê xiraban arêdanê ke berê keyeyê xo seba ke bikerê werd. Ganî dewlete êdî rewşa esnaf û welatijan bivîna."

 

'Ma rotiş ra zêde ma rojê xo derbaz kenê'

 

Sozdar Şîmdî ya ke bazar de çerezan roşena û va: "Karê ma sey verê nîyo. Seba ke pere çin o, girewtoxî zî çin ê. Ma nêeşkenê rotiş bikerê. Reyan ma qet çîyêk nêroşenê. Na rewşe tesîr serê ma de zî keno. Verê ma eşkayîne îdare bikerdêne. Verê qet nêbo tay, zaf pere qîmê ma kerdêne. Ma xebatkarî di rojan keye de bimanê, ma do a roje vêşan bimanê. Coka ma mecbûrê ke her roj bixebityê."

 

'Dewletêka winasî ra merdim nêeşkeno umîd bikero' 

 

Gulîstan Abîşa ke lazimîyê cinîyan roşena wina va: "Nika qet kar çin o. Verê rewşa ma hîna baş bî. Çîyêk kewtêne destê ma qîmê ma kerdêne. La nika tu çîyêk sey verê nêmendo. Nika rojane ma nêeşkenê debara xo bikerê. Kes nêeşkeno çîyêk bigîro. Ma zî serê siba heta şan de dezgehan nişnenê ro. Ez hem keye de xebityena û hem zî tîya xebityena. Karê mi zehmet o la gama ke ez bieşkî debara xo bikerî ez kêfweş bena. Dewletêk ra winasî tu umîdê mi çin o. Ganî cinî bieşkê debara xo bikerê û nêewnê destê kesî ra."

 

Bazar de esnafeka bîn Ayten Oansoy zî wina va: "Nika her çî zaf vay o. Verê ma tewr baş rotiş kerdêne la nika pereyê ke ma bi dest kenê ma nêeşkenê debara xo bikerê û nêeşkenê nanêk zî berê keyeyê xo."