Arêdayîşê engure û wedaritişê mehsereyan ke serê payîze dest pê keno, ver bi zimistanî ra êdî êdî peynî beno. La cinî mîyanê rezan de engura peynî kom kenê û xeylê tewir xidayan viraznenê. Wayîrê rezan engura ke yenê rotene û mendê zî dimayê ke arêdanê şîreyê ci vejenê. Engura ke yena pelçiqnayene û şîreyê ci yena vetene ci ra bastêq, dims û meşlûl yenê viraştene. Cinîyê Midyatî yê Mêrdînijî ke nê karî kenê, vanê ma heme şîre ra feyde gênê û xebitnenê.

 

'Verê dims bi arêdayîşê cîranan dir ameyîne viraştene'

 

Şewqîya Înana ke dewa Aynvardî yê girêdayê qezaya Mîdyadî ya, vanê ke welatîyê Mîdyad û bi taybet yê dewan debara xo bi ramitiş kenê. Tewr zêde zî Midyad ra rezî yenê ramitene. Ver bi peynîya payîzî dir rezan de engure yenê arêdayîşî û kenê xida. Şewqîya zî nika dims viraznena. Binê beroşê dimsî de adir geş kena. Şewqîya xebata xo dir ma dir qisey kerd û va: "No karê ma yo bi serran o ma kenê. Ma pîlanê xo ra musayî. Demê verê ma pêro cîranî yewbînan kom bîne, bi rojan karê ma dewam kerdêne. Ma pîya sohbet kerdêne, ma deyîran vatêne û ma hetkarîya yewbînan kerdêne. O wext seke nika îmkan çinbî. Ma şîne serê mahseran û cayê înan cîya bi. La nika her keye de cayê viraştişê dimsî esto. Êdî ma seke verê kom zî nêbenê. Nika keyeyê ma yo qij tîya yo û ma pîya viraznenê. Reyna zî pêwa zehmetîyê ke ma vînenê, ma kêfweş zî benê. Berardişê ke ma gênê ma kêfweş keno."

 

'Arêdayîş ra heta viraştiş ma kedêke pîl danê'

 

Şewqîya dewam de wina va: "Ma şîreyê xo kenê beroş. Ma hîn herra ke seba dimsî taybet a zî ma kenê ci. Dimayê ke giryeno, dims kel yeno ci. Gama ke herrî kewena bin, ma zanê ke êdî dims virazya yo. Wexto ke dims hîn beno serdin ma kenê kup, bîdon yan zî şûşeyan. Rez ra heta qedênayîşî dimsî ma xeylê zehmetî ancenê. Semedê girnayîşê dimsî ma şinê ko û kolîyan arêdanê. Heta ke ma kîloyêk dims bi dest kenê, ma xeylêk kolîyan xebitnenê. Ma verde vindenê ke adir kêm nêbo û geş kenê. Ma hîn engure xo zî hamnanî rê wedarinenê û kenê eskic. Sewbîna ma şîre ra bastêq û meşlûlan zî viraznenê. Berardişê ke ma bi dest kerdê, ma roşenê. Çi heyf, ma heqdestê xo nêgînê. La reyna zî çimeyê debara ma yo."

 

'Ma tewir bi tewir xida bi dest kenê'

 

Sonya Akaya zî eynî dewe de karê rezî dir eleqedar bena wina va: "Na dewe de xora debara ma bi ramitiş û pesdewarî ya. Rezê ma kahn ê. No demêk zaf derg o ke serê na herre de rezî yenê wey kerdene. Gama ke engure ma resena ma arêdanê. Ma keyeyanê xo de mehsere viraşto û ma uca de awa engure vejenê. Heme firaqê ma yê karî amade yê. Ma engure xo ra şerab zî viraznenê la tewr zêde ma suryanijî şerab viraznenê. Muslumanî xidayê bînan viraznenê."