COLEMÊRG - Endamê Meclîsê Dayîkê Aştîye ya Geverî dîyar kerd ke ê polîtîkayê ke kurdan kenê dişmin qebûl nêkenê û vatî, eke kurdanî yewbînan bikişê şerm o. 

 

Endamê Meclîsê Dayîkê Aştîye ya Geverî dîyar kerdî ke ê polîtikayê ke ciwanê kurdî Başûrê Kurdistanî anê hemverê yewbînan qebûl nêkenê û veng dayî Mesûd Barzanî û vatî, “Dinya alem pêro dişminê kurdan ê wa ma zî nêbê dişminê yewbînan.”

 

‘Ma şer ney aştî û edalet wazenê’

 

Meclîsê Dayîkê Aştîye Kudret Aksu dîyar kerd ke ê êdî nêwazenê dayîkî bibermê û wina va: "Çi Rojawan çi Vakur çi Başûr ma pêro Kurd ê. Kurdistan 4 parçe yo. Ganî ma heme bibê yew û dest bi dê destê yewbînan. Wa doman û tornê ma nêmirê. Pêşmerge û gerîla ferq nêkenê. Ma şer ney aştî û edalet wazenê. Kurdî yewbînan bikşê şerm o. Kesêk nêwazeno wayê û birayê xo bikişo.”

 

‘Erdogan hemverê to kayan kay keno’

 

Dayîka Aştiye Kiymet Dogma hêrişê kimyewî yê 1988 ê Seddam Huseyinî ard vîr û wina va: “Çîyê ke Sedam bi kerdo, ewro do Erdoganê bi to bikero. Erdogan hemverê to kayan kay keno. Domanê ma ameyî kiştene. Çekê kîmyewî eştî Gever, her ca pirrî Hîzbûllah kerdî. Ti zî benê sebebê birakiştişî. Êdî bes o. Wa êdî wayê û bira nêkewê pê.”

 

‘Wa na gonî vindero’

 

Dayîka Aştîye Gulçin Karabuk wina va: "Şima nê wextî de dîyo wayê û bira pêrodayîş kerdo. Ma vatêne Barzanî birayê ma yo pîl o, la ma nêzanayîne o bido birayê xo ro. Xora dişminê ma dano ma ro. Wa na gonî vindero. Ma birakiştişî qebûl nêkenê. Dinya alem pêro dişminê kurdan ê wa ma zî nêbê dişminê yewbîban. Ganî Berzanî çareserîyêk bîvîno û nêverdo şer vejîyo.”