MÊRDÎN - Selamete Yeşîlemen prosesê qedexeyê tebervejîyayîşê kuçeyan ê Nisêbînî de hewşeyê keyeyî de amebî qetilkerdene. Dosyaya Selamete de pêwa ke şahidê serebûtî estê zî 5 serrî yo tu averşîyayîş çin o. Avûkatê dewa dîyar kerd ke bi sebebê xeylê wextî serê dewa ra derbaz bîyo dosya padê.

 

Qezaya Nisêbînî ya Mêrdînî de 13ê teşrîna peyêne 2015 de qedexeyê tebervejîyayîşê kuçeyan amebi îlankerdene û roja hîrêne yê qedexeyî de Selamete Yeşîlmen (44) hewşeyê keyeyî xo ke taxa Firatî de bîbî hedefê gûleyan û amebî qetilkerdene. Goreyê îfadeyê şahidan “hêriş, hetê wesayîtê zirxî yê leşkerî ra ameyo meydan” pêwa nê îfadeyê şahidên zî dewa 5 serrî yo dewam kena û kiştoxê Selamete nînê eşkerakerdene.

 

‘Îfade esto la kiştoxî yenê pawitene’

 

Derheqê qetilkerdişê Selamete de avûkatê dewa muracatê serdozgerîya Nisêbînî kerdibî. Dosya ke 5 serrî yo ameya akerdene de otopsî û îfadeyê 4 şahidan ca gêno. Goreyê zanayîşê ke avûkatan ra girewt îfadeyê heme şahidan bi nê rengî yo: “Serê taxe de wesayîtêk leşkerî yê zirxî ke şibyane panzere vindertî bî. Guleyê ke Selamete kişt û domananê ma birîndar kerdî wesayît ra vejîyayî.” Îfadeyê şahidan ra dozger vano, “Delîlî qîm nêkenê ke ma kiştoxan tespît bikerê” û coka zî 5 serrî yo dosya de tu averşîyayîş çin o. Sewbîna avûkatan dîyar kerd ke bi sebebê xeylê ser akerdişî dewa ra derbaz bîyo wazenê ke dosya padê.

 

Hedîse de çimê aye kor bi

 

Hedîseya ke Selamete ameye qetilkerdene de çimê Sevcane Yeşîlmen zî ameye korkerdene û Sevcane zî hema tedawî vînena. Goreyê zanayîşê ke ma keyeyî ra girewt Sevcane çimê ci platîn tede yo û çimo bîn zî platîn ra zirar vîneno. Her ke şino tehlûkeyê Sevcane çimê xo yê bîn ra zî kor bibo dewam keno.