Rûperîn Bekir

 

ŞEHBA - Koçberê Efrînî yê ke Wargehê Berxwedanî yê Şehbayî bi ca bîyê, zehmetîyê cuye yê ke mewsîmê zimistanî de bi xoverdayîşê xo derbaz kenê, ardî ziwan û wina va: “Zehmetîyê zimistanî do hemverê xoverdayîş û erjê Efrînijan, nêbo asteng.”

 

3 serrî şarê Efrînijî ke koçberî wargeh û gundewarê Kantonê Şehbayî bîyê, derbaz bî. Pêwa şert û mercê zehmet, reyna zî xover danê. Her çiqas serd û mewsîmê zimistanî xidar bo zî, îradeyê înan nêameyo şiknayene. Mîyanê çadiran de dewaya agêrayîşê Efrînî kenê. Cinîyê Efrînijî yê ke kampa Berxwedanî yê Şehba de ciwîyenê, fikrê xo ameyîşê mewsîmê zimistanî de ardî ziwan.

 

‘Çadirî xeylî tehlûkeyê serê cuya merdiman dano awankerdene’

 

Cinîya bi nameyê Zahîde Xilo ke welatiyê Kantonê Efrînî yê û Wargehê Berxwedanî bi ca bîya wina va: ”Ma koçê Kantonê Şehbayî bî û mîyanê wargehê koçberî de bi ca bî. Nika mewsîmê zimistanî verê ma de yo, xeylê zehmetîyê cuye esto. Seba ke ma çadirê naylonan de yê, wextê tafînyîşê soba de xeylê çadirî veşênê. Domanî seba serdo xidar nêweş kewenê. Ma nêzanê xo serd yan zî hêrişê dewleta tirkî bipawê. Her Efrînîjêk seba herra xo, xover danê.”

 

‘Ma batanî ra ma cilan viraznenê’

 

Leyla Hisên zî zehmetiyê mewsîmê zimistanî de wina va: “Mewsîmê zimistanî emsar xeylêk xidar o. Bi varayîşê vartî dir pêro çadirê ma awe kewtî ci. Ma nê zehmetîyan bi xoverdayîşê xo derbaz kenê. Her çiqas merdimî biwazo zî çadirî qet nêbenê sey keye û coka cuya çadiran zaf xidar o. Her kesêk nêeşkeno nê zehmetîyan rê tehemûl bikero. Çîyêk asan nîyo ke merdim çadiran de biciwîyo. Ma betanîyan ra cilê zimistanî viraznenê û xo serdî ra pawenê.”

 

‘Şaredarî paştdayîş dana ma’

 

Qudrete Dawûd bale ant serê hetkarîya şaredarî û wina va: “Bi taybetî bi ameyîşê zimistanî dir ma bi zehmetîyê cuye dir rî bi rî mendî. La bi hetkarîya şaredarî, ma hîn nê zehmetîyan derbaz kenê. Tu rêxistinê merdimayî heta nika rewşa ma verê çiman ra derbax nêkerdo. Serdo qerisnaye do hemverê xoverdayîşê ma nêbo asteng.”