AMED - Leyla Taş, hema qij bî dest bi kar kerd dimayê ke pîl bî hetê keyeyî ra ameye astengkerdene, la Leyla hemverê astengî û tedayan xo rê terzîxaneyêk akerd û 6 serrî yo uca de debara xo kena û wina veng da cinîyan: "Wexto ke cinî biwazo eşkena pêro çî bikero. Cayê cinî tena keye nîyo.”

 

 

Xeylê cinî hemverê cuya bîyaye ke tu heq nêdano cinî sere wedarnenê. Wexto ke cinîyêke sere wedarnena, tesîr cinîyanê bînan zî kena. Cinî pîya hemverê fehm û hişmendîyê serdest ê camêrdan vejîyenê. Înan ra yew zî Leyla Taş a. Leyla 24 serrî ya û taxa Seyrantepî ya Yenîşehîrê Amedî de terzîxaneyêk akerd û 6 serrî yo debara xo kena. Leyla hemverê vatişê pî û birayê xo sere wedarna û bi waya xo dir 2 dikanan ray bena.

 

Qetî veng nêda keyeyê xo

 

Leyla dîyar kerd ke vernê de seba problemê ekonomî xebityaya û va: “Mi emro qij ra dest bi xebate kerd. Keye de problemê ma yê ekonomî zêde estbî. Coka mi seba xebate lazimî dî û mi  tekstîl de dest bi xebate kerd. Dimayê ke rewşa keyeyî bî nprmal, ez zî resaya emrê 18 serrî û êdî hemverê xebata mi vejîyayî. Mi ra vatî, 'Çi hewceyo cinî bixebityo, cayê cinî keye yo’ mi nê vatişan tesdîq nêkerd û mi xebata xo dewam kerd. Çiqas ez bixebityê zî tedayê keyeyî serê mi de zêde bi. Dimayê nê hedîseyan mi mabêne da û ez ameya keye. O wext mudurê atolye karêk da û mi atolyeyêk akerd la dimayê ke mudurê ma îflas kerd mi atolye pada. No çî kêfê keyeyî ard.”

 

‘Ez qetî xebate ra qut nêbîya’

 

Leyla pêwa nêzdîbîyayîşê keyeyê xo fek kar ra vera nêdana û va: "Dimayê ke mi atolyeya xo pada, demêk keye de mendî. Keye nêverdayîne ez cayê dûr de bixebityî. La mi bê xebat nêeşkayîne. Seba ke mi ekonomîyêk xoser waştêne, mi bi no hawa taxa Seyrantepe de dikana deştişî akerd. Senîn mi akerd, tedayê birayê mi zî dest pêkerd. La mi sere nêtewêna û ez 6 serrî tîya xebityaya. Ewilî bi 2 heb makîneyan mi dest pêkerd nika zî 2 dikanan rê ewnîyena. Reyan cinîyê ke yenê dikan vanê, 'werrekna ma zî bieşkayîne bixebityayîne.’ Ma dikan de cinîyan dir yenê têhet, sohbetan kenê û cuya yewbînan musenê.”

 

‘Waştişê mi umîd dano cinîyê bînan’

 

Leyla tewr peyîn qiseykerdişê xo de wina va: "Ganî cinî tu wext xo muhtacê camêrdan nêkerê. Çi heyf, xeylê cinî zewac sey xilasî vînenê. Bi no hawa îrade û hêzê xo şiknenê. Coka pêro cinî seba ekonomîyêk xoser dest bikerê têkoşîn bikerê. Bê guman xidarîyê xebate zî esta la waştişê cinî do xidarî xelas bikero. Waştiş û bawerîya min a serê xebate umîd dano cinîyê derûdorî. No zî mi kêfweş keno û hêzêk pîl dano mi.”