Melîke Aydin

 

ÎZMÎR - Dimayê erdlerzî, xeylê cayan çadirî ameyî ronayene la seba kêmbîyayîşê îmkanê hijyen û weşîya welatîyê Îzmîrî bi tehlukeyê vîrûsê koronayî dir rî bi rî mendî. Kedkaranê weşîye dîyar kerdî ke hemverê vilabîyayîşê vîrusî ganî mexdûrê erdlerzî keyeyan de bêrê bi ca kerdene. 

 

Erdlerzê ke 30ê teşrîna verêne ame meydan de 114 kesî dinyaya xo bedilna. Xeylê awanî rijyayî û xeylê awanî zî seba tehlûke ameyî vengkerdene. Bi hezaran welatîyê Îzmîrê nika çadiran de cuya xo dewam kenê û hetêk ra zî erdlerz bi tersik pîl mîyanê welatijanê Îzmîr de. Tedbîrê ke hemverê vilabîyayîşê vîrusî ameyne girewtene bi psîkolojîyê erdlerzî ameyî xovîrrakerdene. Doktora Nêweşxaneyê Unîversîteya Egeyî Sîbel Ersîn û Hemsereka Sendîkaya Kedkarê Weşîye (SES) a Şubeyê Îzmîrî Nûrsel Yucesoy, ajansê ma rê qisey kerdî û bale antî serê zehmetîyê karî.

 

‘Vîrusê korona peygoş kenê’

 

Sîbele qiseykerdişê xo de bale ant serê şert û mercê nêweşîyê korona û wina va: "Seba nêweşîyê vîrusê korona tuvalet çinbi, nika ma o kêmî werte ra wedarna. Nika ma nêweşê korona, nêweşê bînan ra visna. Seba ke welatî deprem ra bi tesîr bîyê, vîrus pey goş kenê. Bê maske mîyanê çadiran de şinê, yenê. Ma hewl danê ke derheqê na babete de xebatêk bidê destpêkerdene. Çadirê ke nêweşê koronayî estê, ekîbê fîlyasyonî ameyî û testê ê kesan kerdî. 2 rojî verê nika 2 çadiran de pozîtîf vejîya. Çadirê ke nêzdîyê uca de bî ameyî vengkerdene.”

 

‘Cayê ke ma manenê bi problem ê’

 

Sîbele dîyar kerd ke seba ameyîş û şîyayîşê çadiran nêeşkenê tespîtê nêweşan bikerê û wina va: "Seba surkilasyonê mabêne çadiran de ma nêeşkenê tespîtê nêweşan bikerê. Cayê ke ma manenê û kar kenê zî bi problem ê. Seba ke çadirî serê erdêke xalî de ameyê ronayene û goreyê varanî nêameyê amadekerdene. Şan de çadiran de soba nînê fînayene. No zî beno sebebê grîbî zî. Wexto ke ma erdlerzî dir têkoşîn kenê ma eynî wextî de korona dir zî têkoşîn kenê.”

 

‘Mîyanê çadiran de mesafe nêameyo verdayene’

 

Nûrsele zî qiseykerdişê xo de bale ant serê xebatanê SESî û wina va: "Hema pandemî bi, tesîrê ci giran bi. Nika zî erdlerz vejîya meydan. Pêwa her çî ma reyna hewl danê ke welatîyanê xo rê xizmet bikerê. Hetê AFAD û sazgehê sivîlan ra çadirî ameyî ronayene, labelê mîyanê çadiran de mesafe zêde nêamebi verdayene. No çî bi sebebê kaosî. Sazgeh de cayê werdî akerdî la welatî bêmaske û bêpawitene şinê. Tîya qelebalix zêde virazêno. No çî beno sebebê zêdebîyayîşê nêweşîyê korona. Her çadire de 4 û 5 kesî manenê.”

 

‘Ma koordînasyonê merkez awan kerd’

 

Nûrsele dîyar kerd ke xeylê merkezê weşîye seba erdlerzî xesar dîyê û wina va: "Ma seke Platformê Şubeyê KESKî merkezê koordînasyonî awan kerd. Ma tîya bi mexdûrê erdlerzî dir mîyanê têkilîyan de yê. Lazimî hetê şaredarîya Bayraklî ra yenê kerdene.”